बूढीगण्डकीमा लेदोसहितको बाढी, केही घर बगाएको आशंका
बूढीगण्डकी नदीमा लेदोसहितको बाढी आएको छ।
गोरखाको चुमनुब्री गाउँपालिकास्थित चुम्चेतको उग्युलुङ खोलामा आएको बाढीले बूढीगण्डकी नदीमा पानीको बहाव बढाएको गाउँपालिका अध्यक्ष निमा लामाले जानकारी दिए। उग्युलुङ खोला बूढीगण्डकी नदीको सहायक खोला हो।
प्रमुख जिल्ला अधिकारी धर्मेन्द्रकुमार मिश्रले बूढीगण्डकीमा ठूलो आवाजसहित बाढी आएको सूचना प्राप्त भएको बताए।
उनका अनुसार घटनाबारे बुझ्न नेपाली सेनाको टोली त्यसतर्फ जाँदै छ। हेलिकप्टर पनि पठाउने तयारी गरिएको छ। सशस्त्र प्रहरी बल (एपीएफ) र नेपाल प्रहरीको टोलीसमेत परिचालन भइरहेको उनले जानकारी दिए।
बाढीका कारण मानवीय क्षति भएको सूचना आएको छैन। बगरमा रहेका एक–दुईवटा घर बगाएको भन्ने खबर आएको छ। त्यसबारे पुष्टि गर्दैछौँ,’ उनले भने, ‘बाढी कुन ठाउँबाट आएको हो र के भएको हो भन्नेबारे बुझिरहेका छौँ।’
स्थानीयका अनुसार यस क्षेत्रमा नदी थुनिने र त्यसपछि लेदोसहितको बाढी आउने घटना हुँदै आएका छन्।
घटनाबारे थप विवरण आउन बाँकी छ।
