स्थापना दिवस मनाउँदै नेपाल प्रहरी
नेपाल प्रहरी २०१२ मा स्थापना भएको हो।
काठमाडौं– नेपाल प्रहरीले आइतबार ६७औं स्थापना दिवस मनाइरहेको छ । स्थापना दिवस अवसरमा नक्सालस्थित प्रहरी प्रधान कार्यालयमा विशेष कार्यक्रम आयोजना गरिएको छ ।६७औं प्रहरी दिवसलाई प्रधानमन्त्री शेरबहादुर देउवाले सम्बोधन गर्नेछन् । नेपाल प्रहरी २०१२ मा स्थापना भएको थियो । वर्षभरिमा उत्कृष्ट काम गरेका सकल दर्जालाई प्रहरी प्रधान कार्यालयले पुरस्कृत गर्दै आएको छ ।
यस पटक कार्यदक्षता मूल्यांकनमा प्रदेश–१ प्रहरी कार्यालयका डीआईजी सुदीप गिरी उत्कृष्ट भएका छन् । डीआईजी गिरीलाई प्रहरी ब्याटन प्रदान गरिनेछ ।प्रहरी ब्याटनमा छनोट गर्नुअघि अतिरिक्त महानिरीक्षक (एआईजी) उत्तमराज सुवेदी नेतृत्वको कार्यदक्षता मूल्यांकन टिमले स्थलगत अनुगमन गरेको थियो । प्रतिस्पर्धामा प्रदेश १ प्रहरी कार्यालय उत्कृष्ट ठहरिएको प्रहरी प्रधान कार्यालयले जनाएको छ ।
प्रदेश प्रहरी कार्यालय, सो मातहतको जिल्ला, दंगा, गण, चौकी र ट्राफिक व्यवस्थापनबारे अनुगमन गर्दा डीआईजी गिरीको कमान्ड कन्ट्रोल, अफिस व्यवस्थापन र अपराध अनुसन्धान उत्कृष्ट रहेको मूल्यांकन समितिको निष्कर्ष छ ।प्रहरी दिवस अवसरमा करिब २५ जना सकल दर्जालाई पुरस्कृत गरिने प्रहरी प्रवक्ता (डीआईजी) टेकप्रसाद राईले बताए ।
यस्तै, डीएसपी अनिल घिमिरेले पूर्ण शान्ति पुरस्कार पाएका छन् । कुल ५० हजार राशि बराबरको सो पुरस्कार २५ हजार नगद र २५ हजार बराबरको मेडल दिने गरिन्छ । प्रहरी वृत्त कालीमाटीमा कार्यरत घिमिरेलाई पूर्ण शान्ति पुरस्कारका लागि छनोट गरिएको प्रहरी प्रधान कार्यालयले जनाएको छ ।
पूर्ण शान्ति पुरस्कार पूर्व आईजीपी पूर्णबहादुर खवास र उनकी पत्नी शान्तीदेवी खवासले स्थापना गरेका हुन् । विशेष ब्यूरोमा कार्यरत प्रहरी उपरीक्षक (एसपी) सन्तोष खड्का सर्वोत्कृष्ट अनुसन्धानकर्ता ठहरिएका छन् । प्रहरी दिवस अवसरमा उनलाई सर्वोत्कृष्ट अनुसन्धानकर्ताको पुरस्कार दिइनेछ ।
इलाका प्रहरी कार्यालय अनारमनिका इन्चार्ज रुगम कुँवरलाई उत्कृष्ट अनुसन्धानकर्ताको रूपमा पुरस्कृत गरिनेछ । डीएसपी कुँवरले झापामा एक जना भारतीय नागरिकको हत्या भएको घटनामा संलग्न आरोपीलाई पक्राउ गरेर कानुनी दायरामा ल्याएका थिए ।
