हालसम्म आयोगले सोध्यो १५ स्पष्टीकरण
आयोगले निर्वाचन आचारसंहिताविपरीतका गतिविधि गर्नेहरूलाई स्पष्टीकरण सोधेको हो।
काठमाडौं– निर्वाचन आयोगले आगामी ४ मंसिरमा हुने प्रतिनिधिसभा र प्रदेशसभा निर्वाचन कार्यक्रम सुरु भएयता विभिन्न राजनीतिक दलका नेता, उम्मेदवारलगायत गरी १५ वटा स्पष्टीकरण सोधेको छ ।पार्टीका मुख्य नेता, उम्मेदवार, व्यक्ति, संस्था, पार्टी, मन्त्रालय, सरकारी कार्यालयलगायतलाई सो संख्याको स्पष्टीकरण सोधिएको आयोगका सह–प्रवक्ता कमल भट्टराईले बताए ।
आयोगले यसअघि माओवादी केन्द्र अध्यक्ष पुष्पकमल दाहाल ‘प्रचण्ड’ लाई उम्मेदवारी दर्ताका क्रममा किन बाजागाजा लगेको भनेर स्पष्टीकरण सोधेको थियो ।आयोगले प्रचण्ड र सिके राउतसहित ६ र ८ संस्थालाई स्पष्टीकरण लिएको छ । आचारसंहिता उल्लंघन गर्ने ६ व्यक्ति र ८ संस्थालाई स्पष्टीकरण सोधेको हो ।
प्रचण्ड, पचरौता नगरपालिकाका मेयर जलन्धर सिंह जैसवारल व्यापार तथा निकासी प्रवद्र्धन केन्द्रका सातौं तहका अधिकृत गोकुल वस्ती र जनमत पार्टीका अध्यक्ष चन्द्रकान्त राउत सिके राउतलाई आयोगले स्पष्टीकरण सोधेको छ ।यस्तै, हाम्रो नेपाल पार्टीका अध्यक्ष अनन्तराज घिमिरे र प्रतिनिधिसभा सदस्य नुवाकोट निर्वाचन क्षेत्र–१ का उम्मेदवार बद्री मैनालीलाई पनि स्पष्टीकरण सोधेको छ ।
श्रम रोजगार तथा सामाजिक सुरक्षा मन्त्रालय, संघीय मामिला तथा सामान्य प्रशासन मन्त्रालय, सहरी विकास मन्त्रालय, नेपाल प्रज्ञा प्रतिष्ठान, अर्थ मन्त्रालय, धितोपत्र बोर्ड, बिमा समिति र मुख्यमन्त्री तथा मन्त्रिपरिषद् कार्यालय, गण्डकी प्रदेशलाई स्पष्टीकरण सोधिएको आयोगले जनाएको छ ।
