काठमाडौंका सबै ठाउँ चौबीसै घन्टा खुला गर्न प्रशासनले थाल्यो तयारी
काठमाडौंका सबै क्षेत्र चौबिसै घण्टा खुला गर्न प्रशासनले तयारी थालेको छ।
प्रमुख जिल्ला अधिकारी ईश्वरराज पाण्डेले मंगलबार सूचना जारी गर्दै काठमाडौंका अन्य बजार क्षेत्रको व्यापार व्यवसाय पनि चौबीसै घन्टा खुला गर्ने तयारी भएको जानकारी दिएका हुन्।
अहिले ठमेल र दरबारमार्ग चौबीसै घन्टा खुला हुन्छ।
बाँकी क्षेत्रको व्यापार व्यवसाय पनि चौबीसै घन्टा खुला गर्न स्थानीय तह, विभिन्न विभाग, कार्यालय, यातायात व्यवसायी र निजी क्षेत्रसँग समन्वय गरिने काठमाडौं प्रशासनले जनाएको छ।
काठमाडौं संघीय राजधानी र महत्वपूर्ण क्षेत्र भएकाले भरपर्दो सुरक्षा व्यवस्था तथा आवश्यक पूर्वाधार सुनिश्चित गरेर मात्रै जिल्लाका सबै क्षेत्र चौबिसै घण्टा खुला गर्ने प्रजिअ पौडेलले बताएका छन्।
यसका लागि सडक यातायात, स्वास्थ्य सेवा, विद्युत्, इन्टरनेट, सिसिटिभी, सडक बत्ती लगायतका पूर्वाधारको पर्याप्त व्यवस्था मिलाउने तथा यातायात, व्यापार, व्यवसाय, आपूर्ति र सुरक्षाको भरपर्दो प्रबन्ध गर्ने गरी रणनीतिक तयारी भइरहेको सूचनामा उल्लेख छ।
वृहत् तयारीपछि मात्रै काठमाडौंका समग्र क्षेत्र चौबिसै घण्टा खुला गर्ने निर्णय गरिने प्रशासनले जनाएको छ।
त्यतिन्जेल दरबारमार्ग र ठमेलबाहेक अन्य क्षेत्रका व्यवसायीलाई अर्को सूचना जारी नभएसम्म साविककै निर्धारित समयभित्र व्यवसाय सञ्चालन गर्न प्रशासनले आग्रह गरेको छ।







