त्रिपुरेश्वर घटना : गाडीभित्र जलेका व्यक्तिको पहिचानमा प्रहरी नै अलमलमा
प्रहरीले दिउँसो आगजनी गरिएको बसका चालकको साथबाट काभ्रेको पनौती ठेगाना भएको २३ वर्षीय दावा लामाको लाइसेन्स फेला पारेको जनाएको थियो । लाइसेन्समा प्रयोग भएको नम्बरमा सम्पर्क गर्दा भने उनले आफू सकुशल भएको बताएको प्रहरीले बताएको छ ।
ट्राफिक प्रहरीसँगको विवादपछि सोमबार दिउँसो बसभित्र आगो लगाएका व्यक्तिको पहिचानलाई लिएर प्रहरीले थप अनुसन्धान थालेको जनाएको छ ।
प्रहरीले घटनालगत्तै सञ्चारकर्मीहरूसँग चालकको साथबाट फेला परेको कागजातका आधारमा उनी काभ्रे, पनौती ठेगाना भएको २३ वर्षीय दावा लामा भएको बताएको थियो । ‘उपचार गराउने क्रममा समेत उहाँले दावा लामा बताउनुभएको थियो,’ ट्राफिक प्रहरीका एसपी नरेशराज सुवेदीले भने ।
तर, प्रहरीले लाइसेन्समा प्रयोग भएको नम्बरमा सम्पर्क गर्दा उनले आफू सकुशल भएको बताएका छन् । ‘अहिले लाइसेन्सबारे नै अनुसन्धान गर्नुपर्ने देखियो,’ उनले कान्तिपुरसँग भने, ‘विस्तृतमा बुझ्ने काम गरिरहेका छौं ।’ घाइते व्यक्तिको परिवारसँग कुरा हुँदा समेत उनी दावा नभएको खुलेको प्रहरीको भनाइ छ ।
प्रहरीले सम्पर्क गरेको दावालेचाहिँ आफ्नो लाइसेन्स हराएको बताएका छन् । प्रहरीले उनको एकिन पहिचान खुलाउने प्रयास गरिरहेको बताएको छ । त्रिपुरेश्वरमा भएको यो घटनाको छानबिन गर्न उपत्यका प्रहरी कार्यालय, रानीपोखरीले एसएसपी रमेश बस्नेतको नेतृत्वमा छानबिन समितिसमेत बनाएको छ ।
गम्भीर घाइते चालकको आगलागीमा परेर शरीरको ९० प्रतिशत भाग जलेको छ । बा २ ख ४२७४ नम्बरको गाडीका ती चालकलाई आगजनीपछि उद्धार गरिएको थियो भने दमकलको सहयोगमा आगो नियन्त्रणमा लिइएको थियो ।
प्रहरीसँग हामीले घाइते चालकको नाम र परिचयबारे सोध्यौँ । प्रहरीका एक अधिकारीले भने परिचय द्विविधा भएकाले अनुसन्धान सकिएपछि मात्र विस्तृत विवरण बताउने बताए ।







