प्रतिनिधिसभामा विश्वासको मत लिँदै प्रधानमन्त्री प्रचण्ड
काठमाडौं–प्रधानमन्त्री पुष्पकमल दाहाल प्रचण्डले आज प्रतिनिधिसभामा तेस्रोपल्ट विश्वासको मत लिँदै छन् । फागुन २१ मा सत्ता गठबन्धनमा परिवर्तन भएसँगै नेपाली कांग्रेसले प्रधानमन्त्रीलाई दिएको विश्वासको मत फिर्ता लिएपछि आज पुनः प्रधानमन्त्रीले विश्वासको मत लिन लागेका हुन्।
प्रधानमन्त्रीले १४ महिनामा तेस्रो पटक विश्वासको मत लिन लागेका हुन्। यसअघि २०७९ पुस १० मा एमाले, रास्वपा, राप्रपा, जसपा, जनमत पार्टी, नागरिक उन्मुक्ति पार्टी लगायतका समर्थनमा प्रधानमन्त्री भएपछि उनले पुस २६ मा संसदमा विश्वासको मत लिएका थियो। त्यसबेला प्रतिपक्षमा रहेको नेपाली कांग्रेस र एकीकृत समाजवादीसहितका सबै दलले उनलाई समर्थन गरेका थिए। त्यसपछि राष्ट्रपति चुनावमा प्रधानमन्त्रीले कांग्रेस लगायतका दलसँग गठबन्धन गरेपछि एमाले, रास्वपा र राप्रपाले सरकार छोड्दै समर्थन फिर्ता लिएका थिए। त्यसपछि २०७९ चैत ६ मा प्रचण्डले दोस्रोपटक संसदमा विश्वासको मत लिएका थिए।
अहिले फेरि कांग्रेससँगको गठबन्धन भत्काएर नयाँ बनाएपछि उनले तेस्रोपटक विश्वासको मत लिन लिन लागेका हुन्। हाल प्रधानमन्त्रीलाई एमाले, माओवादी, रास्वपा, जसपा र नेकपा एकीकृत समाजवादीको समर्थन छ। प्रतिनिधिसभामा अहिले कायम २७४ सदस्यीयमा बहुमत सिद्ध गर्न १३८ सदस्य आवश्यक पर्छ । ५ दलीय गठबन्धनसँग प्रतिनिधिसभामा १५३ सदस्य छन् । जसमा एमालेका ७८, माओवादीका ३२, रास्वपाका २१, जसपाका १२ र एकीकृत समाजवादीका १० सांसद रहेका छन्।
