ललितपुरको गोदावरीमा बस्दै कांग्रेस महासमिति बैठक

काठमाडौं–सत्तारुढ कांग्रेसको महासमिति बैठक आजदेखि ललितपुरको गोदावरीमा बस्दै छ।
२०७८ मंसिर २४ मा काठमाडौंमा सम्पन्न १४औँ राष्ट्रिय महाधिवेशनको दुई वर्ष तीन महिनापछि ‘नीति अधिवेशन’का रुपमा महासमिति बैठक बस्न लागेको हो।
बैठकमा भाग लिन देशभरबाट महासमिति सदस्य राजधानी काठमाडौं आएका छन्।
प्रतिनिधिसभामा अन्य दलको भन्दा बढी सांसद र मन्त्री रहेको, आधाभन्दा बढी प्रदेशमा सरकार प्रमुख भएको र लगभग आधा स्थानीय सरकारमा प्रभुत्व जमाएको कांग्रेसको महासमिति बैठकले लाई चासोका साथ हेरिएको छ।
अधिवेशनको ललितपुरको गोदावरीस्थित सन्राइज हलमा आज दिउँसो १ बजे पार्टी सभापति शेरबहादुर देउवाले उद्घाटन गरेका छन्। राजनीतिक स्थायित्व, रुपान्तरण र नवीनता, स्वतन्त्रता, न्याय र समानता नेपाली कांग्रेसको नीतिगत प्रतिबद्धता मूल नाराका साथ सुरु हुन लागेको महासमिति बैठकमा देशभरबाट दुई हजार बढी महासमिति सदस्य सहभागी छन्।
महासमिति बैठकमा वर्तमान केन्द्रीय समितिका पदाधिकारी तथा केन्द्रीय सदस्य एक सय १६५, प्रतिनिधिसभा निर्वाचन क्षेत्रबाट प्रतिनिधित्व हुने महासमिति सदस्य एक हजार सात सय ८०, नेपाली जनसम्पर्क समितिबाट ८९, भ्रातृ तथा शुभेच्छुक संस्थाबाट ६९ जनाको सहभागिता हुँदै छ ।
केन्द्रीय कार्यसमितिको बैठकको निर्णयअनुसार महासमितिका सदस्य नरहेका प्रदेश कार्यसमितिका सभापति, जिल्ला कार्यसमितिका सभापति र भ्रातृ संघ तथा शुभेच्छुक संस्थाका केन्द्रीय अध्यक्षलाई महासमिति बैठकमा आमन्त्रित सदस्यका रुपमा सहभागी हुँदै छन्।
ललितपुरको गोदावरीमा चार दिनसम्म चल्ने महासमितिलाई व्यवस्थित एवं प्रभावकारी ढंगले सञ्चालन गर्नका लागि पार्टी सभापति एवं पूर्वप्रधानमन्त्री शेरबहादुर देउवा संयोजकत्वको मूल आयोजक समितिले छुट्टाछुट्टै उपसमिति निर्माण गरी काम अगाडि बढाएको छ ।
कांग्रेसले महासमिति बैठकमा पेस हुने विभिन्न दस्तावेज केन्द्रीय कार्यसमिति बैठकबाट पारित गरिसकेको छ।
पार्टी केन्द्रीय कार्यालय सानेपामा गत फागुन ३ र ४ मा बसेको केन्द्रीय समितिले उपसभापति पूर्णबहादुर खड्काद्वारा प्रस्तुत नीति प्रस्ताव, महामन्त्री गगनकुमार थापाद्वारा प्रस्तुत सांगठनिक प्रस्ताव, महामन्त्री विश्वप्रकाश शर्माद्वारा प्रस्तुत समसामयिक राजनीतिक प्रस्ताव र प्रवक्ता डा प्रकाशशरण महतद्वारा प्रस्तुत आर्थिक अवस्था, सम्भावना र भावी दिशासम्बन्धी प्रतिवेदन र लेखा समितिका संयोजक श्यामकुमार घिमिरेद्वारा प्रस्तुत लेखा परीक्षण प्रतिवेदन पारित गरेको थियो।
कांग्रेसले आजदेखि सुरु हुने महासमिति बैठकमा जाने प्रतिनिधिको सहजताका लागि दैनिक २० वटा बस निःशुल्क सञ्चालन गर्न लागेको छ।