राष्ट्रिय सभा निर्वाचन ः आज रातीदेखि प्रचार–प्रसारमा रोक

काठमाडौं– निर्वाचन आयोगले राष्ट्रिय सभाको १९ सदस्यका लागि फागुन ११ मा हुने निर्वाचनअन्तर्गत आज राती १२ बजेपछि मतदान नहुञ्जेल प्रचारप्रसार निधेषको अवधि कायम गरेको छ ।
प्रचारप्रसार कार्य गर्न रोक लगाइएको अवधिमा राजनीतिक दलका पदाधिकारी, उम्मेदवार, दलका भ्रातृ संगठन तथा आचारसंहिता पालना गर्नुपर्ने अन्य व्यक्ति, संस्था वा निकायले निर्वाचन प्रचारप्रसारलगायत कुनै पनि प्रकारका छलफल, अन्तक्र्रिया, सभासम्मेलन, कार्यशाला गोष्ठी आदि गर्नुहुँदैन ।
आयोगका प्रवक्ता शालिग्राम शर्मा पौडेलले उक्त अवधिमा कुनै पनि विधि, प्रक्रिया वा माध्यमबाट मत माग्न र निर्वाचन प्रचारप्रसार गर्न नहुने, सामाजिक सञ्जाल, अनलाइन, छापा वा अन्य कुनै माध्यमबाट राजनीतिक दल वा उम्मेदवारको पक्ष वा विपक्षमा कुनै सन्देश, सूचना वा प्रचारप्रसारका सामग्री पोष्ट वा सेयर गर्न वा गराउन नहुने भएकाले सोबमोजिम आचरण पालना गर्न÷गराउन अनुरोध गरेका छन्।
राष्ट्रिय सभाका १९ सदस्यको पद आगामी फागुन २१ मा सकिँदै छ। कार्यकाल सकिनु एक महिनाअघि निर्वाचन गरिनुपर्ने कानुनी व्यवस्था रहेको छ।