राष्ट्रिय सभा सिट बाँडफाँट गर्न बालुवाटारमा कांग्रेस–माओवादी नेताहरूको जमघट

काठमाडौं–आगामी माघ ११ मा हुने राष्ट्रिय सभा निर्वाचनका लागि सिट बाँडफाँटको विषयमा छलफल गर्न कांग्रेस र नेकपा माओवादी केन्द्रका शीर्ष नेताहरुले बालुवाटरमा छलफल गरेका छन्।
छलफलमा कांग्रेस सभापति शेरबहादुर देउवा, उपसभापति एवं रक्षामन्त्री पूर्णबहादुर खड्का, महामन्त्री गगन थापा र प्रमुख सचेतक रमेश लेखक सहभागी थिए।
माओवादीबाट अध्यक्षसमेत रहेका प्रधानमन्त्री पुष्पकमल दाहाल प्रचण्ड, गृहमन्त्री नारायणकाजी श्रेष्ठ र उपमहासचिव वर्षमान पुन सहभागी थिए।
बालुवाटार छलफलमा प्रदेशमा दलको मतभारबारे प्रारम्भिक चर्चा गरिएको थियो।
सत्ता गठबन्धन दलसँग सामूहिक छलफल गरेर सिट बाँडफाँटको निर्णय गर्नेबारे बालुवाटारमा सहमति जुटेको बताइन्छ।
कांग्रेसको पुस १२ देखि पुस १४ सम्म बसेको केन्द्रीय कार्यसमिति बैठकले सत्ता गठबन्धनसँग तालमेल गरी राष्ट्रिय सभा चुनावमा साझा उम्मेदवार तय गर्ने निर्णय गरेको थियो। सरकारबाट सिफारिस भई राष्ट्रपतिबाट मनोनीतसहित २० सदस्य रिक्त हुने भएपछि माघ ११ मा राष्ट्रिय सभा निर्वाचन तोकिएको छ।