शिक्षाको लगानी कसैले खोस्न सक्दैन ः अर्थमन्त्री महत
काठमाडौं– अर्थमन्त्री डा. प्रकाशशरण महतले पढाइमा गरेको लगानी कसैले खोस्न नसक्ने बताएका छन् । नुवाकोटको शिवपुरी गाउँपालिका–७ स्थित कुम्भेश्वर माध्यमिक विद्यालयको ५०औं वार्षिकोत्सव स्वर्णजयन्तीमा डा. महतले यस्तो बताएका हुन् ।
उनले भने, ‘अरु क्षेत्रमा गरेको लगानी मासिन, आगलागी हुन सक्छ, बाढीपहिरोले बगाउन सक्छ तर शिक्षाको लगानी कसैले खोस्न सक्दैन ।’ शिक्षाको मन्दिरको प्रांगणमा उभिएर प्रविधिको विकाससँगै हामीले आफूलाई अगाडि सार्नुप¥यो, शिक्षक साथीलाई मद्दत गर्न अनुरोध गर्न चाहन्छु।’
राजधानी काठमाडौं नजिक भएर नुवाकोट पछि प¥यो, हुनेखाने पनि काठमाडौंतिरै बसाइँ सर्दा शिक्षाप्रति बेवास्ता भएको उनको भनाइ छ । सोही कारण नुवाकोट धेरै पछाडि परेको मन्त्री महतको दाबी छ ।
‘२०४६ पछि नुवाकोटमा विस्तारै विकास सुरु भएको हो । ककनीको बाटो काठमाडौं बिजुली लैजान बनाएको हो । ०४६ पछि पुल, सिँचाइ, बिजुली विस्तार भयो । हामी विकासप्रेमी हौं, पार्टी भनेर विभेद गर्दैनौं,’ मन्त्री डा. महतले भने, विकास हुनुपर्छ, विकास सबैका लागि हो ।’
उनले आफू अप्ठेरो समय अर्थमन्त्री भएको बताए । ‘बजेट सीमित थियो, अनावश्यक ठाउँमा धेरै खर्च भएको थियो, बाटो सुविधा भयो भने उत्पादन बढ्छ । त्यो किसिमको प्राथमिकता हामीले दिइरहेका छौं’, मन्त्री डा. महतले भने, समर्पण र इमानदारका साथ काम गर्ने कोसिस गरिरहेका छौं । मेरो मन नुवाकोटमै छ, मेरो क्षमताले भ्याएसम्म काममा लागिरहन्छु ।’
काठमाडौंसँग सडक सञ्जाल जोडिएपछि सहर नुवाकोटमै बन्न थाल्ने उनको अनुमान छ । ‘लगानी भित्रिन थाल्छ, जग्गाको मूल्यवृद्धि हुनुका साथै स्थानीयको आम्दानी बढ्न थाल्छ । हामी समृद्धि हुने बाटोमा जानुपर्छ’, मन्त्री डा. महतले भने ।







