सिद्धबाबा सुरुङ मार्ग निर्माणलाई गति दिन निर्देशन

काठमाडौं– चिनियाँ कम्पनीले निर्माण गरिरहेको सिद्धार्थ राजमार्गको बुटवल–तानसेन सडक खण्डको सिद्धबाबा सुरुङ मार्ग निर्माणलाई थप गति दिन भौतिक पूर्वाधार तथा यातायातमन्त्री प्रकाश ज्वालाले आग्रह गरेका छन्।
निर्माणाधीन सिद्धबाबा सुरुङ मार्ग निरीक्षणका लागि बुटवल पुगेका मन्त्री ज्वालाले काममा कुनै पनि लापरवाही नगर्न निर्माण व्यवसायीलाई निर्देशन दिए ।
उनले भने, ‘सिद्धबाबा सुरुङमार्गको ८÷९ प्रतिशत मात्रै काम भएको छ। कामलाई गति दिन स्थलगत निरीक्षण गरेको हुँ।’
सुरुङ निर्माणका क्रममा कुनै अप्ठेरो अवस्था आए सरकारले समाधान गरिदिने तर ढिलाइ गर्न नपाइने उनको भनाइ छ ।
मन्त्री ज्वालाले माथिल्लो सिद्धबाबा प्रवेशद्वारसहित ३ वटा क्षेत्र निरीक्षण गरेको मन्त्रालयले जनाएको छ ।
सिद्धार्थ राजमार्गको बुटवल पाल्पा सडकखण्ड अन्तर्गत बुटवलको तल्लो सिद्धबाबादेखि पाल्पाको दोभान चौकीसम्म करिब ३ किलोमिटर सडक क्षेत्र पहिरोका कारण जोखिमयुक्त रहँदै आएको छ । सोही कारण यहाँ सुरुङमार्ग निर्माण अगाडि बढाइएको हो ।
चाइना स्टेट कन्स्ट्रक्सन इञ्जिनियरिङ कर्पोरेसनले ७ अर्ब ३४ करोड लागतमा सुरुङ मार्ग निर्माणको सम्झौता गरेको छ ।
सडक विभागका महानिर्देशक सुशीलबाबु ढकालले सुरुङमार्गको कामले गति लिन नसक्नुका विभिन्न कारणमध्ये नेपालका लागि नयाँ आयोजना हुुनु पनि रहेको स्वीकारे ।