कोशीका मुख्यमन्त्री थापाविरुद्ध परेको रिट न्यायाधीश खतिवडाको इजलासमा
काठमाडौं– कोशी प्रदेशका मुख्यमन्त्री उद्धव थापा सरकारको वैधानिकताविरुद्ध परेको रिट निवेदनमाथिको सर्वोच्च अदालतका न्यायाधीश ईश्वरप्रसाद खतिवडाको इजलासमा हुने भएको छ ।
प्रदेशसभाबाट विश्वासको मत लिँदा सभा सञ्चालन गर्ने ज्येष्ठ सदस्य इस्राइल मन्सुरीको समेत हस्ताक्षर गराएको विषयलाई लिएर एमालेले सर्वोच्चमा बुधबार कोशी सरकारको वैधानिकताविरुद्ध सर्वोच्चमा रिट दर्ता गराएको थियो।मुख्यमन्त्री थापाले गैरसंवैधानिक रुपमा विश्वासको मत लिएको दाबीसहित सर्वोच्चमा परेको रिटको सुनुवाइ गर्न आज पेशी तोकिएको छ।
सभामुखविहीन प्रदेशसभामा ज्येष्ठ सदस्य मन्सुरीले बैठक सञ्चालन गरेका थिए। बैठक सञ्चालन गर्ने सभाध्यक्ष तटस्थ हुनुपर्ने संवैधानिक प्रावधानविपरीत थापाले प्रदेशसभामा मन्सुरीको हस्ताक्षरबाट बहुमत पाएका थिए।मुख्यमन्त्रीको कदम असंवैधानिक भएको भन्दै एमालेले थापा नेतृत्वको सरकार बर्खास्त गर्न अन्तरिम आदेश मागेको छ।
मुख्यमन्त्री थापाले विश्वासको मत लिने क्रममा सभामुखको भूमिकामा रहेका अध्यक्षमण्डलका सदस्य कांग्रेस सांसद मन्सुरीको हस्ताक्षरबाट बहुमत जुटाएका हुन्।सभाध्यक्षको मतसहित विश्वासको मत लिएको भन्दै थापा नेतृत्वको सरकार बर्खास्त गर्न अन्तरिम आदेशको माग गर्दै दायर गरिएको रिटमा सुनुवाइ हुन लागेको हो।
कोशी सरकारका पूर्व मुख्यमन्त्री समेत रहेका नेकपा एमाले संसदीय दलका नेता हिम्मतकुमार कार्कीले रिट दायर गरेका हुन्।
