एमाले–लोसपाबीच चुनावी तालमेलको छलफल
आगामी चुनावमा कसरी अगाडि बढ्ने भनेर दुवै पार्टीका नेताहरुबीच छलफल भएको हो
काठमाडौं– आगामी ४ मंसिरको चुनावी तालमेलका लागि एमाले अध्यक्ष केपी ओलीले लोसपा अध्यक्ष ठाकुरसँग छलफल थालेका छन् । दुई नेताबीच भएको कुराकानी बाहिर सार्वजनिक भइनसके पनि आउँदो चुनावमा एमाले र लोसपा तालमेल गरेर अगाडि बढ्ने विषयले प्राथमिकता पाएको बताइन्छ ।
एमालेले लोसपालाई केही सातायता आउँदो चुनावमा तालमेल गरेर अगाडि बढ्न प्रस्ताव पठाएको थियो । दुई नेताबीचको छलफलमा महन्थले पार्टीमा थप छलफल गरेर आउने वचन अध्यक्ष ओलीलाई दिइसकेका छन् ।
एमालेका एक नेताका अनुसार अध्यक्ष ओलीले तीन दिनदेखि महन्थसँग चुनावी तालमेलबारे छलफल गरिरहेका छन् । आउँदो चुनावमा सहकार्य गरेर अगाडि बढ्ने विषयमा दुवै नेता सहमति नजिक पुगेको उनले बताए ।
जसपाबाट चोइटिएर बनेको लोसपाले मधेसमा आफ्नो मुख्य प्रतिद्वन्द्वी अध्यक्ष उपेन्द्र यादवको पार्टी रहेको बताउँदै आएको छ । जसपा हाल सत्ता गठबन्धनमा रहेको छ । पार्टी अध्यक्ष यादवले आउँदो चुनावमा सम्मानजनक सिट बाँडफाँट हुनुपर्ने माग गर्दै आएका छन् ।
यद्यपि उपेन्द्रले केही समयअघि लोसपालाई पनि मधेसमा चुनावी तालमेल गरेर अगाडि बढ्न सुझाएका थिए। तर लोसपाले उपेन्द्रको त्यो आग्रहलाई अस्वीकार गरेको छ ।
‘आउँदो चुनावमा एमालेसँग सहकार्य गर्नुको विकल्प छैन,’ लोसपाका एक नेताले भने, ‘त्यसो नभए हामी संघ र प्रदेश दुवैमा पराजित हुन्छौं ।’ मधेस प्रदेशमा रहेका ३२ प्रतिनिधिसभा निर्वाचन क्षेत्रमध्ये करिब १८ वटा लिने गरी एमालेसँग सहमति बन्न सक्ने उनको अनुमान छ । एमालेसँगको अनौपचारिक छलफल सकारात्मक हुँदै गएको दुवै दलका नेताहरुले दाबी गरेका छन् ।







