महानगरले हटाउन थाल्यो इन्द्रचोकको पार्किङ,फनपार्कलाई २४ घन्टाभित्र कर तिर्न ताकेता
इन्द्रजात्रालाई लक्षित गरेर इन्द्रचोकको पार्किङ हटाउन महानगरले थाल्यो कारबाही
काठमाडौं–काठमाडौं महानगरले बुधबारदेखि इन्द्रचोकको पार्किङ हटाउन सुरु गरेको छ ।इन्द्रजात्रालाई लक्षित गरेर इन्द्रचोकको पार्किङ हटाउन मंगलबार पर्यटनमन्त्री जीवनराम श्रेष्ठले स्थलगत अनुगमन गरी निर्देशन दिएपछि पार्किङ हटाउन सुरु गरेको महानगर प्रहरीले बताएको हो ।
वसन्तपुर चोकदेखि इन्द्रचोक क्षेत्र र असन गल्ली, मखन गल्लीतर्फ सबैतिरबाट गाडी आउने भएकाले अव्यवस्थित बनेकाले जात्रा सञ्चालन गर्न कठिनाइ हुने भन्दै पार्किङ हटाउन थालिएको महानगर प्रहरीको भनाइ छ ।
यस वर्षको इन्द्रजात्रा लक्षित कार्यक्रमहरु सुरु भइसकेका छन् । जात्राको पहिलो कार्यक्रमअन्तर्गत १३ भदौमा इन्द्रध्वजका रूपमा गाडिने रुख कटान भइसकेको छ। १९ भदौमा बिहान ७ बजेर २४ मिनेटको साइतमा इन्द्रध्वजलाई नगर प्रवेश गराइनेछ ।
फनपार्कलाई २४ घन्टाभित्र कर तिर्न ताकेता
काठमाडौं महानगरले प्रदर्शनी मार्गमा रहेको काठमाडौं फन पार्क प्रालिलाई कर तिर्न ताकेता गरेको छ । बुधबार महानगरको राजस्व विभागले फन पार्कलाई पत्राचार गर्दै २४ घन्टाभित्र व्यवसाय, वहाल, मनोरन्जन र विज्ञापन कर तिर्न निर्देशन दिएको हो ।
तोकिएको समयभित्र कर नतिरे फनपार्क सिलबन्दी गरी असुल उपर गरिने महानगरले बताएको छ ।
समाजकल्याण परिषद् स्वामित्वको उक्त क्षेत्रमा काठमाडौं फनपार्क प्रालिले भाडामा भौतिक संरचना निर्माण गरेर खेल गतिविधि सञ्चालन चलाउँदै आएको छ ।







