नेकपा माओवादी केन्द्रमा विचलन: अध्यक्ष प्रचण्ड
काठमाडौं– नेकपा माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहालले पछिल्लो समय पार्टीमा विचलन देखा परेको स्वीकारेका छन् ।बिहीबार पार्टी कार्यालय पेरिसडाँडामा आयोजित रामवृक्ष यादवको २८औं स्मृति दिवसलाई सम्बोधन गर्दै उनले पार्टी पछिल्लो समय क्रान्तिकारी नरहेको बताएका हुन् ।
प्रचण्डले भने, ‘यसले पार्टीको वर्ग चरित्र वा क्रान्तिकारी गतिमा नराम्रोसँग असर परेको छ । हामी विचार, कुरा, र मुखमा त अहिले पनि क्रान्तिकारी नै छौं तर हाम्रो व्यवहार, आचरण, दैनिकीसँग त्यो मिल्दैन ।’क्रान्ति, परिवर्तन, समाज, राष्ट्रका निम्ति प्रतिस्पर्धा गर्नेतिर नभई आफ्नै निम्ति कसरी गर्ने भन्नेतिर बढी केन्द्रित हुने गरेको प्रचण्डले सुनाए ।
उनले नेताहरूको मुखमा क्रान्तिकारी शब्द रहे पनि व्यवहार, आचरण, दैनिकीमा नरहेको दाबी गरे ।व्यक्तिवादी चरित्रलाई हटाउन नसके क्रान्तिकारी हौं र हुनुपर्छ भन्ने कुराको औचित्य समाप्त हुने उनको भनाइ छ ।
‘हाम्रो पार्टी अहिले पहिलाजस्तो छैन। धेरै बिग्रेको छ । हामी अलिकति बिग्रेका छौं भन्ने बाटोबाट नै सुरु गर्नुपर्ने ठान्छु म। हामी हिजोजस्तो क्रान्तिकारी छैनौं । व्यक्तिवादी भएका छौं । स्वार्थी भएका छौं,’ प्रचण्डले भने ।







