प्रचण्ड–माधव समूहको आमहडताललाई गृह मन्त्रालयको चुनौती : निर्धक्क व्यवसाय चलाए सुरक्षा दिन तयार
गृह मन्त्रालयले प्रचण्ड–नेपाल नेतृत्वको नेकपाद्वारा बिहीबार गर्ने भनिएको आमहडतालका क्रममा कुनै अवाञ्छित गतिविधि भए त्यसमा संलग्नलाई कारबाही गर्ने चेतावनी दिएको छ ।
मन्त्रालयले उद्योगी तथा व्यवसायीलाई निर्धक्क भएर आफ्नो पेसा, व्यवसाय पूर्ववत् सञ्चालन गर्न पनि आग्रह गरेको छ ।
मन्त्रालयका सहसचिव तथा प्रवक्ता चक्रबहादुर बुढाद्वारा बुधबार साँझ जारी गरिएको विज्ञप्तिमा भनिएको छ, ‘नेपालको संविधान तथा प्रचलित कानुनविपरित शान्ति–सुरक्षामा खलल पुग्ने, सार्वजनिक तथा निजी सम्पत्तिको तोडफोड, आगजनी, सर्वसाधारण नागरिकले प्रयोग गर्ने सार्वजनिक यातायात सञ्चालनमा अवरोधलगायतका ध्वंसात्मक एवं अवाञ्छित गतिविधि नगर्न÷नगराउन तथा संविधानप्रदत्त हकको निर्वाध उपभोग गर्न पाउने नागरिकको अधिकारको सम्मान गर्न सम्बद्ध सबै पक्षसँग मन्त्रालय हार्दिक अनुरोध गर्दछ ।’
विज्ञप्तिमा दैनिक सञ्चालन हुने उद्योग, पेसा, व्यवसाय सञ्चालनमा कुनै वाधा अवरोध पुग्न नदिने गरी सुरक्षा निकायबाट आवश्यक सुरक्षा व्यवस्था मिलाइने उल्लेख छ ।
‘यातायात व्यवसायी लगायत सबै उद्यागी–व्यवसायीलाई निर्धकक एवं पूर्ववत् आ–आफ्ना उद्योगधन्दा, पेसा, व्यवसाय सञ्चालन गर्न गृह मन्त्रालय हार्दिक आग्रह गर्दछ,’ विज्ञप्तिमा भनिएको छ ।







