निर्वाचन आयोगद्वारा ओली, प्रचण्ड–नेपाल नेकपालाई बोलावट
निर्वाचन आयोगले दुई टुक्रा भएको नेकपा प्रधानमन्त्री केपी ओली समूह र पुष्पकमल दाहाल–माधव नेपाल समूहलाई छलफलका लागि बोलाएको छ ।
आयोगका प्रवक्ता राजकुमार श्रेष्ठका अनुसार नेकपाका दुइटै समूहलाई छलफलका लागि बोलाइएको हो ।
‘अध्यक्ष वा अध्यक्षले तोकेको आधिकारिक प्रतिनिधिसहित छलफलमा आउन भनिएको छ,’ श्रेष्ठले भने, ‘शुक्रबार बिहान साढे ११ बजे छलफल हुन्छ ।’
नेकपाका दुवै समूहबाट छलफलमा पाँच–पाँच जना पठाउन आयोगले भनेको छ ।
प्रधानमन्त्री ओलीले ५ पुसमा प्रतिनिधिसभा विघटन गरेपछि नेकपामा ओली र प्रचण्ड–नेपाल गरी दुई समूह क्रियाशील छ । यी दुवै समूहले आफूहरू नै आधिकारिक नेकपा भएको दाबी गरेका छन् । तर, आयोगले दुवै समूहलाई आधिकारिकता दिएको छैन ।
शुक्रबार नेकपाका दुई समूहसँग आयोगले मुख्य गरी दुइटा विषयमाथि छलफल गर्ने तयारी गरेको छ ।
‘निर्वाचन प्रयोजनका लागि दल दर्ता गर्न सूचना प्रकाशन गर्ने र आयोगले निर्वाचनसम्बन्धी हालसम्म गरेका तयारीबारे जानकारी दिने विषयमा छलफल हुन्छ,’ श्रेष्ठले भने ।
प्रधानमन्त्री ओलीले प्रतिनिधि सभा विघटन गरेर वैशाख १७ र २७ मा निर्वाचन तय गरेका छन् । तर, प्रतिनिधिसभा विघटनसम्बन्धी मुद्दा सर्वोच्चमा विचाराधीन छ ।







