मन्त्रिपरिषद् विस्तारमा सरकारलाई सर्वोच्चको कारण देखाऊ आदेश
सर्वोच्च अदालतले सरकारलाई प्रतिनिधिसभा विघटनपछि मन्त्रिपरिषद् विस्तार गर्नुपर्ने कारण लिखित रूपमा पेस गर्न आदेश दिएको छ ।
न्यायाधीश अनिलकुमार सिन्हाको इजलासले एक साताभित्र जवाफ लिएर छलफलमा उपस्थित हुन सोमबार आदेश जारी गरेको हो । सर्वोच्चले दुवै पक्षलाई उपस्थित हुन भनेको छ ।
गत १३ पुसमा वरिष्ठ अधिवक्ता दिनेश त्रिपाठी, अधिवक्ता लोकेन्द्र ओली र अधिवक्ता केशरजंग केसीले रिट दर्ता गराएका थिए ।
प्रधानमन्त्री केपी ओलीले प्रतिनिधिसभा विघटन गरेपछि प्रचण्ड–नेपाल समूहका मन्त्रीले राजीनामा दिएका थिए । त्यसपछि रिक्त पदमा प्रधानमन्त्रीले १० पुसमा मन्त्रिमण्डल पुनर्गठन गरेका थिए ।
प्रतिनिधिसभा नभएको अवस्थामा संविधानभन्दा बाहिर गरिएको मन्त्रिपरिषद् तत्काल बदर गर्न रिटमा माग गरिएको छ ।
संविधानको धारा ७७(१) ले प्रतिनिधिसभा सदस्य नभएको व्यक्ति प्रधानमन्त्री हुन नसक्ने र अहिलेका प्रधानमन्त्री प्रतिनिधिसभा सदस्यसमेत नभएको अवस्थामा मन्त्रिपरिषद् विस्तार गर्न नसक्ने रिट निवेदनमा जिकिर गरिएको छ ।
धारा ७७(३) ले प्रधानमन्त्री पद रिक्त भए अर्को मन्त्रिपरिषद् गठन नभएसम्म कार्य सञ्चालन गर्नेसम्मको अधिकार दिएको भन्दै संविधानको पालन र संरक्षण गर्ने प्रमुख कर्तव्यबाट राष्ट्रपति गम्भीर रूपमा चुकेको रिटमा उल्लेख छ ।
प्रधानमन्त्री र राष्ट्रपति दुवैबाट संविधानको गम्भीर उल्लंघन हुने कार्य भएको हुँदा संविधानको धारा १३३(२,३) बमोजिम विस्तारित मन्त्रिपरिषद् बदर गर्न उनीहरूले माग गरेका छन् ।







