देउवाले संवैधानिक परिषद् बैठक वहिष्कार गर्ने
कांग्रेस सभापति शेरबहादुर देउवाले प्रधानमन्त्री केपी ओलीले आइतबार बोलाएको संवैधानिक परिषद्को बैठक वहिष्कार गर्ने भएका छन् ।
बैठकमा उपस्थित हुन नसक्ने बेहोराको सन्देश नेता रमेश लेखकमार्फत देउवाले शनिबार प्रधानमन्त्री ओलीलाई पठाएका हुन् ।
स्रोतका अनुसार प्रधानमन्त्री ओलीले डाकेको परिषद् बैठकप्रति नै सन्देह उत्पन्न भएको भन्दै देउवाले अस्वीकार गरेका हुन् ।
कांग्रेसले २९ गते सरकारविरुद्ध देशव्यापी प्रदर्शन गर्दै छ ।
त्यसको मुखमा ओलीले परिषद् बैठक बोलाएर लेनदेन गराई प्रदर्शनलाई प्रभावित पार्न खोजेको कांग्रेस नेताहरूको बुझाइ छ ।
‘संवैधानिक परिषदमा आफू जान नसक्ने कुरा उहाँले भनिसक्नुभएको छ,’ स्रोतले भन्यो ।
आइतबार नै नेकपाको पनि स्थायी कमिटी बैठक छ । उनले पार्टीको बैठक छल्नका लागि पनि संवैधानि परिषद् बैठक बोलाएको हुन सक्ने शंका कांग्रेसको छ ।
संवैधानिक परिषद्मा विपक्षी दलको नेता अनिवार्य हुनुपर्ने कानुनी व्यवस्था छ । अहिले अख्तियार दुरुपयोग अनुसन्धान आयोगमा प्रमुख आयुक्त, आयुक्तलगायत संवैधानिक आयोगहरूमा पदाधिकारी रिक्त छ ।
लामो समय पदाधिकारीविहीन भएपछि ओलीले परिषद् बैठक बोलाउन देउवासँग शुक्रबार छलफल गरेका थिए ।
कांग्रेस प्रवक्ता विश्वप्रकाश शर्माले प्रतिपक्षी दलको देशव्यापी कार्यक्रमलाई लक्षित गरी परिषद् बैठक बोलाउने प्रधानमन्त्रीको नियत सफा नदेखिएको बताए ।
‘उहाँकै पार्टीको पनि बैठक छ, प्रतिपक्षी दलले देशव्यापी कार्यक्रमबारे आफ्नै प्रकारको योजना बनाएको बेला बैठक बोलाउने नियत सफा देखिँदैन,’ उनले भने, ‘त्यसकारण परिषद् बैठक स्थगनको सम्भावना रहे त्यसलाई उचित मान्नुपर्छ ।’







