झागिँदै नेकपा विवाद, ओली–प्रचण्ड पक्षको आ–आफ्नै डम्फु
सचिवालय बैठकमा पेस भएका राजनीतिक प्रस्तावमाथि छलफल चलाउने÷नचलाउने विषयलाई लिएर नेकपा विवाद झनै गहिरिँदै गएको छ ।
गत २८ कात्तिकको सचिवालय बैठकमा अर्का अध्यक्ष पुष्पकमल दाहालले राजनीतिक प्रस्ताव पेस गरेका थिए । १३ मंसिरको बैठकमा प्रधानमन्त्री एवं अध्यक्ष केपी ओलीले प्रचण्डको प्रस्तावको जवाफ दिएका थिए ।
प्रधानमन्त्री ओलीले प्रचण्डको प्रस्ताव अराजनीतिक र आधारहीन रहेको भन्दै त्यसलाई फिर्ता लिनुपर्ने अडान लिएका छन् ।
१६ मंसिरको सचिवालय बैठकमा ओलीले प्रचण्डको प्रस्तावमाथि छलफलैै हुन नसक्ने अडान लिएका थिए । प्रधानमन्त्रीकै अडानका कारण बैठक विषयवस्तुमा प्रवेश नगरी सकिएको थियो ।
बुधबारको बैठकमा प्रधानमन्त्री ओली उपस्थित भएनन् । मंगलबार नै प्रधानमन्त्री ओलीले आफू बैठकमा उपस्थित नहुने बताएका थिए ।
ओली नआएकै कारण २० मंसिरसम्मका लागि सचिवालय बैठक स्थगित भएको छ ।
महासचिव विष्णु पौडेलकै आग्रहमा प्रचण्डले बैठक सारेको बताइन्छ । तर, वरिष्ठ नेता झलनाथ खनाल, माधव नेपाल र प्रवक्ता नारायणकाजी श्रेष्ठले प्रधानमन्त्री नआए पनि छलफल सुरु गर्ने बताएका थिए ।
प्रधानमन्त्री ओलीले भने आफूनिकट नेताहरूसँग अहिलेको अवस्थामा बैठक गर्न नसकिने बताएका छन् ।
पछिल्लो समय प्रधानमन्त्री ओली र प्रचण्डबीचको दूरी यति बढेको छ, दुईबीच २२ दिनदेखि भेट हुन सकेको छैन ।







