सचिवालय बैठकमा गले ओली
प्रधानमन्त्री निवास बालुवाटारमा बुधबार बसेको सचिवालय बैठकमा प्रधानमन्त्री एवं नेकपा अध्यक्ष केपी ओलीले थकित मुद्रामा देखिएका छन् । अर्का अध्यक्ष पुष्पकमल दाहालले पेस गरेको राजनीतिक प्रतिवेदनको जवाफ दिन ओलीले समय मागेका छन् ।
शुक्रबार बसेको सचिवालय बैठकमा प्रधानमन्त्री ओलीले प्रचण्ड प्रतिवेदनको जवाफ दिन समय मागेपछि बैठक १० दिनका लागि स्थगित भएको हो ।
‘प्रचण्डको प्रस्ताव आधारहीन रूपमा ममाथि गम्भीर आरोपसहित आएको छ । त्यसको मैले तयारी गरेर जवाफ दिनुपर्छ । त्यसका लागि समय चाहियो,’ प्रधानमन्त्रीले भनेका छन् ।
कात्तिक २८ गते बसेको सचिवालय बैठकमा प्रचण्डले राजनीतिक प्रतिवेदन पेस गरेका थिए । एकतर्फी रूपमा आएको प्रतिवेदनले पार्टी एकतालाई नै गम्भीर संकटमा पारेको भन्दै प्रधानमन्त्री पक्षधर नेताहरूले प्रतिवेदन फिर्ता लिनुपर्ने बताएका छन् ।
प्रचण्डको प्रतिवेदन फिर्ता नहुँदासम्म कुनै पनि बैठक गर्नुको औचित्य नभएको भन्दै प्रधानमन्त्री ओली बैठक सार्ने तयारीमा थिए ।
तर सचिवालयका बहुमत सदस्यहरुले प्रधानमन्त्री नआए पनि बैठक राख्ने भनेपछि प्रधानमन्त्री बैठकका लागि तयार भएका हुन् ।
१० दिनपछि पुनः बस्ने
नेकपाको सचिवालय बैठक १० दिनपछि पुनः बस्ने गरी सकिएको प्रधानमन्त्रीका प्रेस सल्लाहकार सूर्य थापाले जानकारी दिए । नेकपा सचिवालय बैठकमा ओलीले आफूले पनि प्रस्ताव ल्याउने बताएका थिए ।
पार्टी प्रवक्ता नारायणकाजी श्रेष्ठले ओलीले आगामी १३ मंसिरमा बस्ने बैठकमा आफ्नो प्रस्ताव पेस गर्ने तय भएको जानकारी दिए । सचिवालय बैठकमा यसअघि नै प्रचण्डले पेश गरेको र ओलीले ल्याउने दुवै प्रस्तावमाथि छलफल हुने उनको भनाइ छ ।







