ओलीको दूत बनेर खुमलटार पुगे विष्णु पौडेल
प्रधानमन्त्री एवं नेकपा पार्टी अध्यक्ष केपी ओलीको दूत बनेर अर्का अध्यक्ष पुष्पकमल दाहाल भेट्न महासचिव विष्णु पौडेल खुमलटार पुगेका छन् । प्रचण्ड निवास खुमलटारमा भएको भेटमा पार्टीभित्रको गतिरोध अन्त्यबारे छलफल भएको बताइएको छ ।
गत २७ कात्तिकमा बसेको सचिवालय बैठकमा प्रचण्डले एकतर्फी रूपमा राजनीतिक प्रतिवेदन पेस गरेका थिए ।
प्रतिवेदनमा प्रधानमन्त्रीमाथि जथाभावी आरोप लगाइएको भन्दै प्रधानमन्त्री ओली पक्षधर नेताहरूले फिर्ता लिनुपर्ने बताउँदै आएका छन् ।
प्रधानमन्त्री निकट सचिवालय सदस्य एवं उपप्रधानमन्त्री ईश्वर पोखरेल, स्थायी समिति सदस्य एवं लुम्बिनी प्रदेशका मुख्यमन्त्री शंकर पोखरेल, प्रधानमन्त्रीका प्रेस सल्लाहकार सूर्य थापालगायतले सार्वजनिक रूपमै प्रचण्डले प्रतिवेदन फिर्ता लिनुपर्ने बताएका छन् ।
प्रधानमन्त्री निकट अन्य नेताहरूले पनि प्रचण्डको प्रतिवेदन एकै ठाउँमा बस्न सक्ने खालको नरहेको टिप्पणी गरेका छन् ।
प्रचण्डले प्रतिवेदन फिर्ता नलिए ३ मंसिरको सचिवालय बैठकसमेत प्रभावित हुन सक्ने बताइएको छ ।
ओली प्रस्ताव प्रचण्डद्वारा अस्वीकार
सत्तारुढ नेकपा अध्यक्षसमेत रहेका प्रधानमन्त्री केपी ओलीले बुधबारका लागि तय भएको सचिवालय बैठक केही दिन पर सार्न महासचिव विष्णु पौडेलमार्फत गरेको प्रस्ताव कार्यकारी अध्यक्ष प्रचण्डले अस्वीकारेका छन् । बैठक सार्ने ओलीको प्रस्ताव बोकेर मंगलबार बिहान अध्यक्ष निवास खुमलटार पुगेका महासचिव पौडेललाई प्रचण्डले बैठकमै छलफल गर्ने भन्दै अस्वीकार गरेका हुन् ।
अर्थमन्त्रीसमेत रहेका पौडेलले प्रचण्डसँगको भेटमा समस्या समाधानको सूत्र खोजेर मात्रै बैठक बस्न उपयुक्त हुने ओलीको सन्देश सुनाएका थिए । ‘पार्टीभित्रको विवादको समाधान खोजेर मात्रै सचिवालय बैठक बसौं । त्यसका लागि बुधबारको बैठक केही दिन पर सारौं र सहमतिका लागि छलफल गरौं भन्ने ओलीको प्रस्तावलाई अध्यक्ष कमरेडले अस्वीकार गर्नुभयो’, प्रचण्ड निकट एक नेताले भने, ‘अध्यक्षले बैठकको मिति भएकाले बैठक सार्नु राम्रो नहुने बरु भोलिकै सचिवालयमा बाँकी छलफल गरौंला भनेपछि महासचिव सोही सन्देश बोकेर बालुवाटार जानुभएको छ ।’
महासचिव विष्णु पौडेलले कार्यकारी अध्यक्षसँग भोलिको बैठकबारे छलफल भएको स्वीकार गरे पनि अरु केही बताएनन् ।
प्रचण्डको बैठक नरोक्ने जवाफ बोकेर महासचिव पौडेल मंगलबार नै बालुवाटार पुगेपछि ओलीले आफू निकटका नेताहरुलाई बालुवाटारमै बोलाएर छलफल गरेका छन् ।







