बालुवाटारमा ओलीलाई वामदेव मन्त्रणा
नेकपाका उपाध्यक्ष वामदेव गौतमले अध्यक्ष तथा प्रधानमन्त्री केपी ओलीलाई पार्टीभित्र देखिएका समस्याको समाधान बैठकबाटै खोज्न सुझाएका छन् ।
आइतबार बिहान बालुवाटारमा अध्यक्ष ओलीसँगको भेटवार्तामा उपाध्यक्ष गौतमले प्रचण्ड वा माधव नेपाललाई गाली गरेर समस्याको समाधान नहुने दाबी गरे । बैठक बसेरै प्रस्तावबारे छलफल गर्दै अघि बढ्न सकिने अवस्था कायमै रहेको गौतमको भनाइ छ ।
अध्यक्ष ओलीले भलाकुसारी गर्न गौतमलाई बालुवाटार निम्त्याएका थिए । वामदेव प्रधानमन्त्री निवास पुग्दा महासचिव तथा अर्थमन्त्री विष्णु पौडेल पनि थिए । त्यस क्रममा अध्यक्ष प्रचण्डले गत शुक्रबार बसेको सचिवालय बैठकमा पेस भएको प्रस्तावबारे नेताहरूबीच कुराकानी भएको थियो ।
खासगरी ओलीले प्रचण्डले पेस गरेको प्रस्ताव फिर्ता नलिए समस्या बढ्दै जान सक्ने भन्दै त्यसबारे सहमति ल्याउन गौतमसँग आग्रह गरेका थिए ।
प्रचण्डले पेस गरेको प्रस्ताव फिर्ता लिनुपर्ने ओली पक्ष नेताहरूको भनाइ रहँदै आएको छ । उनीहरूले एकल रुपमा अध्यक्ष प्रचण्डले प्रस्ताव पेसै गर्न नमिल्ने जिकिर गरेपछि उपाध्यक्ष गौतमलगायतका नेताहरूले उक्त प्रस्ताव पाँचै जना नेताले छलफलमा ल्याएको बताएका छन् । प्रचण्डसहित पाँच नेतै प्रस्तावको पक्षमा उत्रिएपछि ओलीले अल्पमतमा परेको महसुस गर्दै आएका छन् । ओलीले शनिबार यसबारे राष्ट्रपति विद्यादेवी भण्डारीसँग समेत छलफल गरे







