बालुवाटारमा ओली र प्रचण्डबीच भलाकुसारी
नेकपाका अध्यक्षद्वय केपी ओली र पुष्पकमल दाहालबीच छलफल भएको छ । प्रधानमन्त्री निवास बालुवाटारमा दुई अध्यक्षबीच पार्टीभित्र देखिएको विवाद समाधानका विषयमा केन्द्रित रहेर छलफल भएको हो ।
भेटमा नेकपाका अर्का अध्यक्ष दाहालले सचिवालय बैठक बोलाउन प्रधानमन्त्री ओलीलाई आग्रह गरेका थिए ।
यसअघि दुई अध्यक्षबीच कात्तिक ४ मा छलफल भएको थियो । त्यसपछि पार्टीभित्र विवाद बढ्दै गएपछि छलफल रोकिएको थियो ।
पछिल्लो पटकको मन्त्रिपरिषद् पुनर्गठन, राजदूत सिफारिस, अन्य नियुक्ति तथा कर्णाली प्रदेशका मुख्यमन्त्री महेन्द्रबहादुर शाहीविरुद्ध अविश्वास प्रस्तावलगायतका विषयमा प्रचण्ड ओलीसँग रिसाएका थिए ।
त्यसपछि ओली निकटका नेताहरू सन्देश लिएर पटक–पटक खुमलटार पुगे पनि प्रचण्डले छलफलका लागि बस्न मानेका थिएनन् ।
गत बुधबार ओली टिकट महासचिव विष्णु पौडेल र दिउँसो स्थायी कमिटी सदस्य सुवासचन्द्र नेम्वाङ प्रचण्ड निवास खुमलटार पुगेका थिए ।
त्यसपछि ओली निकटका नेताहरूले लगातार प्रचण्डसँग भेट गरिरहेका छन् । बिहीबार लुम्बिनी प्रदेशका मुख्यमन्त्री शंकर पोखरेल र शुक्रबार परराष्ट्रमन्त्री प्रदीपकुमार ज्ञवाली प्रधानमन्त्री समेत रहेका अध्यक्ष ओलीको सन्देश लिएर खुमलटार पुगेका थिए ।







