पछिल्लो २० वर्षमा मानव अधिकार उल्लंघन गर्ने २ सय ८६ को नाम सार्वजनिक
राष्ट्रिय मानव अधिकार आयोगले पछिल्लो २० वर्षमा मानव अधिकार उल्लंघन गर्ने २ सय ८६ जनाको नाम सार्वजनिक गरेको छ ।
आयोगले २० वर्षमा ११ सय ५५ वटा मानव अधिकार उल्लंघनका घटनामा कारबाहीका लागि सिफारिस गरेका २ सय ८६ जनाको विवरण सार्वजनिक गरेको हो ।
यसरी मानव अधिकार उल्लंघन गर्नेमध्ये नेपाल सरकारका पूर्वसचिवसहित १६ निजामती कर्मचारी, पूर्वआईजीपी कुवेरसिंह राणासहित ९८ प्रहरी, ८ सशस्त्र प्रहरी, ८५ सेना, ६५ माओवादी नेता तथा कार्यकर्ता, ४ शिक्षक, २ डाक्टर, ७ कैदी र १ मानव अधिकारकर्मी रहेका छन् ।
यीमध्ये ३० जनालाई कारबाही भए पनि २ सय ५६ जनालाई कारबाही नभएको आयोगले जनाएको छ ।
आयोगले बिहीबार प्रकाशन गरेको प्रतिवेदनअनुसार सशस्त्र द्वन्द्वसँग सम्बन्धित ९ सय ४० र अन्य २ सय ५५ वटा सिफारिस रहेका छन् ।
आयोगका १ सय ६३ वटा पूर्ण कार्यान्वयन भएका, ४ सय ४५ वटा आंशिक कार्यान्वयन भएका र ५ सय ८७ सिफारिस अझै कार्यान्वयन भएका छैनन् । आयोगका सिफारिस कार्यान्वयनका लागि नेपाल सरकार, सर्वोच्च अदालत, संसदीय समिति, नागरिक समाज र संयुक्त राष्ट्रसंघीय कार्यक्रमलगायतबाट प्रयास हुँदा पनि सन्तोषजनक नभएको आयोगले जनाएको छ ।
पीडितको जीवन स्वतन्त्रता, समानता र मर्यादाको विषयलाई आर्थिक लेनदेनमार्फत टुंग्याउँदा दण्डहीनता बढेको प्रतिवेदनमा उल्लेख छ ।







