विश्व खाद्य कार्यक्रमलाई यो वर्षको नोबेल शान्ति पुरस्कार

सन् २०२० को नोबेल शान्ति पुरस्कार विश्व खाद्य कार्यक्रम (डब्लूएफपी) लाई दिइने भएको छ । नर्वेको नोबेल कमिटीका अध्यक्ष बेरिट राइस एन्डरसनले शुक्रबार नोबेल शान्ति पुरस्कारको घोषणा गरेकी हुन् ।
उनका अनुसार डब्लूएफपले सन् २०१९ मा ८८ देशका करिब ९.७ करोड मानिसलाई सहायता गरेको थियो । यो वर्ष शान्ति पुरस्कारका लागि ३ सय १८ को नाम सिफारिस भएको थियो । यसमा २ सय ११ व्यक्ति र १ सय ७ संस्था थिए । यसमा अमेरिकी राष्ट्रपति डोनाल्ड ट्रम्पको नाम पनि सिफारिस गरिएको बताइएको थियो ।
इजरायल र यूएईबीचको शान्ति सम्झौताका लागि खेलेको भूमिकाका लागि राष्ट्रपति ट्रम्पलाई नोबेल शान्ति पुरस्कारको हकदार मानिएको थियो । नोबेल शान्ति पुरस्कारका लागि ट्रम्पको नाम सिफारिस भएको यो पहिलो अवसर भने होइन । सन् २०१८ मा पनि दक्षिण कोरिया र उत्तर कोरियाको सम्बन्ध सुधारमा खेलेको भूमिकाका लागि उनको नाम सिफारिस गरिएको थियो । तर, त्यतिबेला पुरस्कार जित्न सकेनन् ।