प्रदेश ५ को नाम लुम्बिनी र राजधानी देउखुरी
रुपन्देहीबासी, प्रतिपक्षी नेपाली कांग्रेसको प्रतिरोधका बाबजुद नेकपाले प्रदेश ५ को स्थायी राजधानी र नामको विषय टुंगो लगाएको छ ।
प्रदेशको स्थायी राजधानी दाङको देउखुरी प्रदेशको नाम पनि लुम्बिनी रहने भएको छ ।
प्रदेशसभाको मंगलबारको बैठकमा भएको भोटिङबाट दुई तिहाइ बहुमतका साथ दाङको देउखुरीलाई राजधानी बनाउने प्रस्ताव पारित भयो ।
भोटिङमा देउखुरीको पक्षमा ६९ र विपक्षमा १३ मत खसेको प्रदेशसभाका सभामुख पूर्णबहादुर घर्तीले बताए । उनका अनुसार प्रदेशसभामा ८७ सदस्य रहेकामा राजधानीको छिनोफानो गर्ने भोटिङमा ८२ सांसद उपस्थित रहे । भोटिङमा देउखुरीको पक्षमा बहुमत आएसँगै उनले स्थायी राजधानीको प्रस्ताव पारित भएको घोषणा गरे ।
हाल प्रदेशको अस्थायी राजधानी रुपन्देहीको बुटवलमा थियो ।
सत्तारुढ नेकपाले सरकारले पेस गरेको प्रस्तावका पक्षमा मतदान गर्न ह्वीप जारी गरेको थियो । यस्तै, प्रमुख प्रतिपक्षी कांग्रेसले भने विपक्षमा मतदान गर्न ह्वीप जारी गरेको थियो ।
तर, कांग्रेसका केही सांसदले ह्वीप उल्लंघन गर्दै प्रस्तावको पक्षमा भोट हालेका छन् ।
यसैगरी प्रदेशको नाम लुम्बिनी राख्ने प्रस्ताव पनि दुई तिहाइले पारित भएको छ । सो प्रस्तावको पक्षमा ७९ मत र विपक्षमा ४ मत खसेको छ । पक्षमा खसेको मत दुई तिहाइभन्दा बढी भए पनि सभामुखले प्रदेशको नाम लुम्बिनी कायम भएको घोषणा गरे ।
खुइलिँदै नेकपा
नेपाल कम्युनिस्ट पार्टी (नेकपा) मा आबद्ध रुपन्देहीका करिब २ हजार ३ सय व्यवसायीहरूले पार्टी सदस्यता त्यागेको घोषणा गरेका छन् । राजीनामा दिनेहरूमा पार्टीको केन्द्रीय विभागका सदस्यसमेत छन् ।
यस क्षेत्रका ३५ वटा व्यावसायिक संघसंस्थामा २ हजार ३ सय हाराहारी नेकपा पार्टी सदस्य छन् ।
व्यवसायीहरूले नेकपा नेतृत्वको सरकार र पार्टी अध्यक्ष समेतले ह्विप जारी गरेर बुटवलमा रहेको राजधानीलाई अन्यत्र सार्ने निर्णय गरेकाले उक्त पार्टीमा रहन नसक्ने भन्दै परित्यागको घोषणा गरेका हुन् ।
होटल तथा रेस्टुराँ व्यवसायी महासंघका पूर्वअध्यक्ष माधव नेपालले पार्टीलाई सरकारमा पु¥याउन महत्वपूर्ण भूमिका खेलेका व्यवसायी मतदाताको अवमूल्यन भएको बताए ।
‘पार्टीले निरंकुश तरिका अपनाएर राजधानी सार्ने निर्देशन ग¥यो । माननीयलाई मत राख्नसमेत वञ्चित गरियो । यसरी निरंकुशता स्वीकारेर पार्टीमा बस्नुको कुनै औचित्य नभएकाले राजीनामा दिने निर्णय गरेका हौं,’ बुटवलमा आयोजित पत्रकार सम्मेलनमा रुपन्देही उद्योग संघका अध्यक्ष बाबुराम बोहराले भने ।
नेपाल उद्योग परिसंघका प्रदेश संयोजक एजाज आलमले निर्वाचनका बेला व्यवसायीको काँध चढेर चुनाव जितेका पार्टीका नेताहरूसँगै बस्नुको कुनै औचित्य नभएको बताए ।
‘आफूहरूलाई धोका दिएर मतदाताको मानमर्दन गर्नुभयो । त्यति मात्र होइन, रुपन्देहीका संघसंस्थाले प्रदेश सरकारको स्थायित्वका लागि भौतिक संरचना उपलब्ध गराएको अवमूल्यन भयो’, उनले भने ।







