दसैंको टिकट बुकिङ असोज अन्तिममा खोल्ने तयारी
यातायात व्यवस्था विभागले दसैंका लागि असोज अन्तिममा सार्वजनिक गाडीको अग्रिम टिकट बुकिङ खुलाउने तयारी गरेको छ ।
असोज अन्तिममा दसैंको अग्रिम टिकट बुकिङ खुला गर्ने तयारी गरेको विभागका महानिर्देशक गोगनबहादुर हमालले जानकारी दिए । उनले यातायात व्यवसायीहरुसँग छलफल गरेर अग्रिम टिकट बुकिङ खुला गर्ने मिति तय गरिने बताए ।
यातायात व्यवसायीले भने अग्रिम टिकट बुकिङबारे अन्योलमा रहेको बताएका छन् । व्यवसायीका अनुसार कोरोना महामारीका कारण यसपालिको दसैंमा विगतका वर्षजस्तो काठमाडांै उपत्यकाबाट बाहिर जाने यात्रुको चाप बढी नहुने भएकाले अग्रिम टिकट बुकिङ अन्योलमा परेको हो ।
नेपाल यातायात व्यवसायी राष्ट्रिय महासंघका महासचिव सरोज सिटौलाले भने, ‘काठमाडौंबाट बाहिर जाने मात्रै हैन, काठमाडौं भित्रिने गाडीमा समेत यात्रु छैनन् । विगतका वर्षमा दसैं आउन एक महिना अघिदेखि टिकट काउन्टरमा भीडभाड हुन्थ्यो, यसपालि सुनसान छ, अग्रिम टिकट बुकिङ खुलाउन आवश्यकजस्तो लाग्दैन ।’







