‘अस्वस्थ निर्वाचन नै भ्रष्टाचारको मूल कारण’
काठमाडौं
पूर्वराष्ट्रपति डा. रामवरण यादवले निर्वाचनमा हुने अस्वस्थ प्रतिस्पर्धा नै भ्रष्टाचारको प्रमुख कारक रहेको बताएका छन् । निर्वाचन निष्पक्ष भए भ्रष्टाचार स्वतः घट्ने उनको भनाइ छ ।
युएस–नेपाल पोलिसी रिसर्च सेन्टरद्वारा आयोजित ‘राजनीतिक संस्थाहरूमा संकट र निर्वाचन प्रणालीमा सुधार’ शीर्षकको भर्चुअल सम्मेलनको शनिबार उदटन गर्दै डा. यादवले भने, ‘निर्वाचन पारदर्शी, निष्पक्ष र धाँधलीरहित हुने हो भने भ्रष्टाचारलगायतका समस्या स्वतः कम हुन्छन् ।’
गणतन्त्र नेपालको प्रथम राष्ट्रपतिको नाताले संविधान जारी गरेको प्रसंग स्मरण गर्दै संविधानमा प्राण भर्ने काम राजनीतिक पार्टीहरूले नै गर्नुपर्नेमा उनले जोड दिए ।
‘प्रथम राष्ट्रपतिको नाताले जनतालाई संविधान समर्पण गर्ने अवसर पाएँ तर संविधानमा मान्नुपर्ने जिम्मेवारी दलहरूकै हो,’ पूर्वराष्ट्रपति डा. यादवले भने, ‘मधेसी, दलित, महिला, आदिवासी जनजातिलगायतका समुदायलाई राष्ट्र निर्माणमा सहभागी गराउन जनतालाई अधिकारसम्पन्न बनाउनुको विकल्प छैन ।’
दक्षिण एसियाकै सबैभन्दा पुरानो देश भएर पनि नेपालमा राजनीतिक परिवर्तन छिटोछिटो भइरहेको उनको बुझाइ छ ।
निर्वाचन आयोगका पूर्वप्रमुख आयुक्त भोजराज पोखरेलले चुनाव महँगो हुँदा निर्वाचित जनप्रतिनिधिहरू नै जनताप्रति उत्तरदायी नभएको बताए । अहिलेको निर्वाचन प्रणालीमा जति नै लोकप्रिय र योग्य भए पनि खर्च गर्न नसक्ने व्यक्ति निर्वाचित भएर आउन असम्भव प्रायः रहेको उनको दाबी थियो ।
आयोजक युएस–नेपाल पोलिसी रिसर्च सेन्टरका अध्यक्ष डा. राजन पन्तले निष्पक्ष र धाँधलीरहित चुनावबिना लोकतन्त्र बलियो हुन नसक्ने औंल्याए ।







