दुई युवकमाथि अभद्र व्यवहारमा अनुसन्धान क्रममा भेटियो पेस्तोल
सुर्खेत प्रहरीले स्वचालित पेस्तोलसहित दुई युवालाई पक्राउ गरेको छ।
दैलेख जिल्लाको आठबिसकोट नगरपालिका– ६ का ३० वर्षीय भीमबहादुर शाही र आठबिसकोट –५ का २७ वर्षीय भूपेन्द्र शाही स्वचालित पेस्तोलसहित पक्राउ परेका हुन्।
सुर्खेतका प्रहरी प्रवक्ता डिएसपी कबिन्द्रसिंह बोहराका अनुसार भदौ २२ गते जिल्ला प्रहरी कार्यालय सुर्खेतमा कार्यरत हवल्दार कृष्णबहादुर रानासमेतले भीमबहादुर र भूपेन्द्रविरुद्ध अभद्र व्यवहारसम्बन्धी मुद्दा दायर भएको थियो ।
भदौ २६ गते सोधपुछका क्रममा भूपेन्द्रले दैलेखको आठबिसकोट – ४ स्थित राकम खोली बजार नजिकै खोल्सामा स्वचालित हतियार पेस्तोल लुकाइ छिपाइ राखेको भन्ने बयान गरेका थिए।
सोही आधारमा जिल्ला प्रहरी कार्यालय सुर्खेतबाट प्रहरी सहायक निरीक्षक कृष्ण चन्दको नेतृत्वमा खटिएको प्रहरी टोलीले दैलेख प्रहरीको सहयोगमा भनिएको ठाउँमा गइ खोज तलास गर्ने क्रममा खोली बजार नकिजै रहेको खोल्साको झाडीमा प्लाष्टिकको पोका बनाइ राखेको स्वचातिल पेस्तोल बरामद भएको थियो।
साथै एक थान म्यागजिन र पेस्तोलमा प्रयोग हुने गोली ५ राउन्ड बरामद भएको डिएसपी बोहरालले बताए।
पक्राउ परेकाहरुमाथि थप अनुसन्धान भइ रहेको पनि प्रहरीले जनाएको छ।
