रवि लामिछानेले प्रधानमन्त्रीलाई बुझाए सहकारी र लघुवित्त समस्या समाधानका उपायसहितको प्रतिवेदन

काठमाडौं– राष्ट्रिय स्वतन्त्र पार्टी (रास्वपा)सभापति रवि लामिछानेले प्रधानमन्त्री पुष्पकमल दाहाल प्रचण्डलाई सहकारी र लघुवित्त संस्थाका समस्या समाधानका नीतिगत उपाय र योजनाबारेको १६ पृष्ठसहितको प्रतिवेदन बुझाएका छन्। लामिछाने स्वयं सहकारी ठगी प्रकरणमा मुछिएको भन्दै विवादमा आइरहेका छन्।
सभापति लामिछाने र उपसभापति डा. स्वर्णिम वाग्ले नेतृत्वको टोलीले आज प्रधानमन्त्री प्रचण्डलाई भेटेर सहकारी र लघुवित्त उँभो लगाउने सुझावसहितको प्रतिवेदन बुझाएको हो।
प्रतिवेदनमा एक वर्षका लागि बचत तथा ऋण कारोबार गर्ने सहकारी दर्ता, कार्यक्षेत्र विस्तार अनुमति तथा सेवा केन्द्र स्वीकृतिका काम बन्द गर्नुपर्ने र सहकारीले घरजग्गालगायत अनुत्पादनशील क्षेत्रमा गरिने लगानीलाई बन्द गर्नुपर्र्नेे भनिएको छ।
५० करोड बढी कारोबार गर्ने सहकारीको नियमन राष्ट्र बैंकअन्तर्गत ल्याउनुपर्ने र बचतकर्ताको निक्षेप सुरक्षण गर्न सहकारी बचत तथा कर्जा सुरक्षण कोष तत्काल स्थापना गर्नुपर्ने प्रतिवेदनको माग छ।
रास्वपाको अर्थनीति विभागले १६ पृष्ठको उक्त प्रतिवेदन डा. वाग्लेको नेतृत्वमा तयार पारेको हो।