कांग्रेस नेताहरू ‘समुदायमा कांग्रेस’अभियानका लागि जिल्ला खटिए, गगनको छुट्टै मिसन
गोकुल अर्याल

काठमाडौं– सत्तारुढ कांग्रेसले पार्टी संगठनलाई मजबुत बनाउन केन्द्रीय नेताहरूलाई जिल्ला खटाएको छ।
कांग्रेसले जिल्ला र स्थानीय तहमा पार्टी कार्यकर्ताको असन्तुष्टि, संगठन निर्माणलगायतमा भइरहेको कार्यप्रगति बुझ्न केन्द्रीय नेता र प्रतिनिधिलाई जिल्ला खटाएको हो। केन्द्रीय प्रतिनिधि यसअघि नै जिम्मेवारी पाएर जिल्ला दौडिइसकेका छन्।
कांग्रेसले केन्द्रीय नेतालाई माघ १६ भित्रै तोकिएको आ–आफ्नो जिल्ला पुगिसक्न आग्रह गरेको छ।
माघ १३ देखि सुरु भएको समुदायमा कांग्रेस अभियान माघ २६ सम्म चलाइनेछ। माघ १६ मा नेता तथा कार्यकर्तालाई आफू क्रियाशील सदस्य रहेको वडामा अनिवार्य जानुपर्ने र श्रम गर्न कांग्रेसले निर्देशन दिएको छ।
अभियानलाई प्रभावकारी बनाउँदै फरक–फरक जिल्लामा फरक–फरक समुदायको बीचमा पुग्न र संवाद गर्न केन्द्रीय नेताहरूलाई पनि जिल्लामा खटाइएको कांग्रेस मुख्यालयले प्रस्ट पारेको छ।
टोलीमा केन्द्रीय नेताहरूसँगै प्रदेशले तोकेका पदाधिकारी पनि रहनेछन्। तोकिएका जिल्लामा भिन्न–भिन्न समुदायका बीचमा भ्रमण, भेटघाट र छलफलको संयोजन पार्टी जिल्ला कार्यसमितिले गर्ने व्यवस्था मिलाइएको कांग्रेस मुख्यसचिव कृष्णप्रसाद पौडेलले बताए।
केही हिमाली जिल्ला र भूकम्प प्रभावित जिल्लामा अभियानअन्तर्गत केन्द्रीय नेता परिचालन नगरिएको उनको भनाइ छ।

कांग्रेसले कोसी प्रदेशमा नेता शेखर कोइरालालाई झापा र सुनसरी हेर्ने गरी खटाएको छ।
यस्तै, नारायण खड्कालाई संखुवासभा, भोजपुर, तेह्रथुम र धनकुटा हेर्ने जिम्मा दिइएको छ।
बलबहादुर केसीले मोरङ, ताप्लेजुङ, पाँचथर, इलाम, ओखलढुंगा र उदयपुर हेर्ने जिम्मा पाएका छन्।
यस्तै, प्रकाशमान सिंहलाई मधेस प्रदेशको महोत्तरी, सिराहा, सप्तरी र धनुषा, बागमतीको सिन्धुली र मकवानपुर हेर्ने जिम्मेवारी तोकिएको छ।
कांग्रेसले नेतृ महालक्ष्मी उपाध्याय ‘डिना’लाई बारा, पर्सा, रौतहट र सर्लाही खटाएको छ। मीनेन्द्र रिजाललाई काठमाडौं, काभ्रे, सिन्धुपाल्चोक, नुवाकोट र रसुवा हेर्ने जिम्मेवारी दिइएको छ।
पुष्पा भुसालले ललितपुर, भक्तपुर, रामेछाप र दोलखाको जिम्मेवारी पाएकी छन्।
महेन्द्र यादवलाई तनहुँ, लमजुङ, गोरखा, पर्वत र नवलपुर खटाइएको कांग्रेसले बताएको छ।
यस्तै, प्रदीप पौडेललाई कास्की, स्याङ्जा, म्याग्दी र बागलुङको अभिभारा सुम्पिइएको छ।
नेता विमलेन्द्र निधिले रुपन्देही, अर्घाखाँची, दाङ, पाल्पा, बाँके र रोल्पा हेर्ने जिम्मा पाएका छन्।
डिला संग्रौलालाई कपिलवस्तु, पाल्पा, गुल्मी, रुकुम (पूर्व), बर्दिया, प्यूठान र नवलपरासी पठाइएको छ।
बीपीपुत्र शशांक कोइरालालाई दैलेख, सल्यान र सुर्खेत खटाइएको छ। भीष्मराज आङ्देम्बेले कैलाली, डोटी, अछाम, बझाङ, डडेल्धुरा, दार्चुला, बैतडी र कञ्चनपुर हेर्ने जिम्मा पाएका छन्।