सहकारी अपचलनमा मुछिएपछि पत्रकार सम्मेलन गर्दै रवि लामिछाने

काठमाडौं– सहकारी अपचलनमा नाम जोडिएपछि राष्ट्रिय स्वतन्त्र पार्टीका सभापति रवि लामिछानेले पत्रकार सम्मेलनमार्फत आफ्नो धारणा सार्वजनिक गर्ने भएका छन्।
ग्यालेक्सी फोर के टेलिभिजनका अध्यक्ष जिबी राईसँगै रास्वपा सभापति लामिछानेको नाम सहकारी ठगी प्रकरणमा मुछिएको छ। लामिछानेले ग्यालेक्सी फोर केमा काम गर्दा राईसँग सहकारीकै रकम अपचलन गरेको आरोप लागेको छ।
दुवै जनाविरुद्ध नेपाल प्रहरीको केन्द्रीय अनुसन्धान ब्युरो (सिआइबी)ले सहकारी ठगी प्रकरणमा परेको उजुरीमाथि अनुसन्धान गरिने जनाएको छ। सिआईबीले उनीहरुविरुद्ध विभिन्न जिल्लामा सहकारीका बचतकर्ताको रकम ठगेको भनेर परेको उजुरीको फाइल मगाइसकेको छ।
दुवै जनाले पोखराको सूर्यदर्शन सहकारी, बुटवलको सुप्रिम बचत, चितवनको सहारा चितवन बहुउद्देश्यीय सहकारी संस्था, वीरगञ्जको सानो पाइला, काठमाडौंको स्वर्णलक्ष्मी बचत तथा ऋण सहकारीको रकम हिनामिना गरेको आशंका छ।
‘गाली गर्न कोही छुट्नु भो कि ? छुट्नु भएको भए गरिहालौं है। मलाई केही कुरा लुकाउनु छैन। पहिलेदेखि जे भन्दै आएँ, त्यसैमा अडिग छु। मिडियामा निरन्तर आइरहेका ‘स्लिप’ मा कोही ‘स्लिप’ हुनैपर्दैन। बाँकी भ्याएसम्म आजै साँझ प्रेस मिटको तयारी गर्दै छु। सारा प्रश्नहरु एकत्रित पार्दै गर्नुहोला। कसैको कुनै प्रश्न नछुटोस्। त्यसैबाट सबै स्पष्ट पार्ने नै छु,’ रविले सामाजिक सञ्जालमा भनेका छन्।