६ महिनामा रोजीरोटीका लागि बिदेसिए करिब साढे ३ लाख नेपाली

काठमाडौं। मुलुकमा रोजगारी अभावका कारण दिनहुँजसो युवा पुस्ता विदेश जाने क्रम बढिरहेको छ। अस्थिर राजनीति र अर्थतन्त्र खलबलिएसँगै विदेश जानेको संख्या पनि ह्वात्तै बढेको छ। मुलुकभित्र भएका उद्योगधन्धासमेत बन्द हुनु र रोजगारीका लागि पढेलेखेका युवायुवतीसमेत विदेश जानुपर्ने बाध्यता बढेको हो।
चालू आर्थिक वर्षको पहिलो ६ महिनामा श्रम स्वीकृति लिएर वैदेशिक रोजगारीमा जाने नेपालीको संख्या ३ लाख बढी पुगेको वैदेशिक रोजगार विभागको तथ्यांकले देखाएको छ।
साउनदेखि पुससम्ममा वैदेशिक रोजगारीमा जान श्रम स्वीकृति लिनेको संख्या ३ लाख ४३ हजार पुगेको विभागका सूचना अधिकारी तथा निर्देशक कविराज उप्रेतीले बताए।
अघिल्लो आर्थिक वर्ष २०७९÷८० को यही अवधिमा वैदेशिक रोजगारीमा जान विभागबाट ४ लाख १४ हजारले श्रम स्वीकृति लिएका थिए।
अघिल्लो वर्षको तुलनामा यस वर्ष श्रम स्वीकृति लिनेको संख्या ७१ हजारले कमी देखिएको उप्रेतीको भनाइ छ।
‘पुसमा ६५ हजार आठ सय १३ नेपालीले वैदेशिक रोजगारीमा जान विभागबाट श्रम स्वीकृति लिएका छन्। यो संख्या नयाँ श्रम स्वीकृति लिने र नवीकरण गर्ने दुवैको हो’, उनले भने।
चालू आर्थिक वर्षको पहिलो ६ महिनामा वैदेशिक रोजगारीमा जानेको संख्या घटेको देखिए पनि साउन र भदौभन्दा मंसिर र पुसमा संख्या बढेको विभागको तथ्यांकमा उल्लेख छ। पुसमा श्रम स्वीकृति लिएर सबैभन्दा धेरैले युएईलाई वैदेशिक रोजगारीको गन्तव्य बनाएको विभागले जनाएको छ।
तथ्यांकअनुसार युएइका लागि १६ हजारले श्रम स्वीकृति लिएका छन् भने साउदी र कतार १४ हजार, मलेसिया आठ हजार, कुवेत तीन हजार र कोरिया एक हजार जना विदेश रोजगारीका लागि गएका छन्।