विमानस्थल यात्रु जाँचपास कक्षमा एक्सरे मेसिन जडान

काठमाडौं– त्रिभुवन अन्तर्राष्ट्रिय विमानस्थल भन्सार कार्यालयको यात्रु जाँचपासमा थप चार वटा एक्सरे मेसिन जडान गरिएको छ। एक्सरे मेसिन जडानसँगै अब जाँचपास १० मिनेटमा हुने जनाइएको छ।
विमानस्थल भन्सार कार्यालयका प्रमुख डा. टोकराज पाण्डेले विगत समय दुई मात्रै एक्सरे मेसिनबाट जाँचपास हुँदै आएकामा आजदेखि थप चार वटा एक्सरे मेसिन जडान गरी जाँचपास गर्न सुरु गरिएको जानकारी दिए।
उनले भने, ‘पहिले दुई वटा मात्रै एक्सरे मेसिन रहेकामा आजदेखि चार वटा एक्सरे मेसिन थपिएको छ। भन्सार एरियाको क्षेत्र साविकभन्दा दोब्बरले बढाइएको र अवैध सामान तथा सुन आउने एरियामा केही समय लाग्न सक्छ। अन्यथा भन्सार एरियाको जाँचमा अब १० मिनेटमा जाँचपास हुनेछ।’
नेपाल होटल तथा पर्यटन प्रशिक्षण प्रतिष्ठान (नाथम) कलेजसँग सम्झौता गरेर १५ विद्यार्थीलाई विमानस्थल भन्सार कार्यालयको यात्रु जाँचपासमा तीन ‘सिफ्ट’मा गरी काममा खटाइएको प्रमुख डा. पाण्डेले बताए।
उनका अनुसार यसले गर्दा यात्रु तथा विदेशी पर्यटकलाई सेवा प्रवाहमा सहज हुनेछ।
यसैगरी विमानस्थल भन्सार कार्यालयले वृद्धवृद्धा अशक्त तथा गर्भवतीका लागि बस्ने व्यवस्थासमेत मिलाएको र भन्सार एरियालाई थप सौन्दर्यकरण गरिएको जनाएको छ। विगतमा जाँचपास गर्न आधा घन्टा लाग्ने जनाइएको छ।