बालुवाटारमा समाजवादी मोर्चाको बैठक, प्रदेशलाई अधिकार दिन सुझाव

काठमाडौं– प्रधानमन्त्रीको सरकारी निवास बालुवाटारमा बसेको समाजवादी मोर्चाको बैठकले प्रदेश सरकारलाई अधिकार दिन केन्द्र सरकारलाई सुझाएको छ।
बैठकले संघीयता कार्यान्वयन गर्नकै लागि पनि प्रदेशलाई अधिकार दिनुपर्नेमा जोड दिएको हो।
बैठकपछि जनता समावादी पार्टी (जसपा)का नेता राजेन्द्रप्रसाद श्रेष्ठले प्रदेशलाई अधिकार दिन अध्यादेशबाटै भए पनि कानुन कार्यान्वयन गर्न मोर्चाले प्रधानमन्त्रीलाई सुझाव दिएको बताए।
प्रदेशलाई अधिकार नदिँदा जनतालाई प्रदेश सरकार बोझ हो कि भन्ने पर्नुमा संविधानमै भएको व्यवस्थालाई आठ वर्षसम्म कार्यान्वयन गर्न नसक्नुको कमजोरी रहेको दाबी गरे।
बैठकमा गणतन्त्र, संघीयता र धर्म निरपेक्षतामाथि बढ्दो रुपमा प्रश्न उठिरहेकाबारे नेताहरूले चिन्ता व्यक्त गरेको उनको भनाइ थियो।
समाजवादी मोर्चालाई प्रदेश स्तरमा जनताको उत्साहपूर्ण सहयोग रहेको उल्लेख गर्दै श्रेष्ठले यसलाई थप निरन्तर दिनुपर्ने सुझाव दिए।
अब मोर्चाले संघीयता, गणतन्त्र, धर्म निरपेक्षताका सन्दर्भमा उठेका सवाललाई चिर्ने गरी कार्यक्रम गर्ने योजना बनाएको उनले बताए।
मोर्चाको बैठक आज बेलुकी ६ बजे पुनः बस्ने गरी स्थगन गरिएको छ।