एकै दिन बस्दै पाँच वटा संसदीय समिति बैठक

काठमाडौं– आज एकै दिन ५ वटा संसदीय समितिका बैठक बोलाइएको छ । पाँचमध्ये संसदीय सुनुवाइ समितिको बैठक सर्वोच्च अदालतमा प्रस्तावित ६ न्यायाधीश नियुक्तिको छिनोफानो गर्न बिहान ११ बजे बस्नेछ ।
यस्तै बिहान साढे ११ बजे नै उद्योग तथा वाणिज्य र श्रम तथा उपभोक्ता हित समितिको बैठकमा उपभोक्ता संरक्षण ऐन, २०७५ को दफा २५ अनुसार गठित केन्द्रीय बजार अनुगमन समितिबाट उपभोक्ताको हक, हित संरक्षणका लागि वस्तु वा सेवाको आपूर्ति व्यवस्था, मूल्य, गुणस्तरलगायत बारेमा हालसम्म भएका कामकारबाही सम्बन्धमा केन्द्रीय बजार अनुगमन समितिसँग छलफल हुनेछ ।
बिहान साढे ११ बजे नै राज्य व्यवस्था तथा सुशासन समितिको बैठकमा काठमाडौं–तराई मधेस दु्रत मार्ग (फास्ट ट्र«याक) सम्बन्धमा, दार्चुलामा नेपाली सेनाले निर्माण गरिरहेको तुसर पानी–कोठेधार–तिंकर सडक सम्बन्धमा छलफल हुने कार्यतालिका तय गरिएको छ ।
त्यस्तै, साढे १२ बजे बस्ने शिक्षा, स्वास्थ्य तथा सूचना प्रविधि समितिको बैठकमा सुरक्षण मुद्रण सम्बन्धमा व्यवस्था गर्न बनेको विधेयकमा छलफल हुनेछ । बिहान ११ बजे नै प्रत्यायोजित व्यवस्थापन तथा सरकारी आश्वासन समितिको बैठकमा सरकारी आश्वासन कार्यान्वयन सम्बन्धमा सहरी विकास मन्त्रीसँग छलफल हुने बताइएको छ ।