सभापति देउवाकै कारण कांग्रेसको अधोगतिः महामन्त्री गगन थापा

काठमाडौं– पार्टी सभापति शेरबहादुर देउवाले कांग्रेसलाई अधोगतितिर लगेको महामन्त्री गगनकुमार थापाले आरोप लगाएका छन् ।
पार्टी कार्यक्रमका लागि पाल्पा पुगेका महामन्त्री थापाले सभापती देउवाले विधानअनुसार काम गर्न नसक्दा कांग्रेसभित्र अराजकता बढेको दाबी गरे ।
उनले भने, ‘सभापतिले अधिवेशन भएको ६ महिनाभित्रै सबै विभाग गठन गरेर पार्टीलाई चुस्त बनाउनुपर्नेमा विधानअनुसार काम नगर्दा कांग्रेस कमजोर देखिएको हो।’
पार्टीभित्रको गुट अन्त्य गर्न वडा कमिटीदेखि केन्द्रीय सभापतिसम्मलाई कांग्रेसका क्रियाशील सदस्यले प्रत्यक्ष मत दिने व्यवस्था गर्न विधान संशोधन गरिने उनको भनाइ छ ।
महामन्त्री थापाले अहिलेको सरकारलाई कांग्रेसले साथ दिन सक्ने अवस्था नरहेको बताए। ‘सरकारमा रहेकाले कांग्रेसको भागमा पनि नराम्रा कामको केही हिस्सा लिनुपर्ने हुन्छ। अब प्रधानमन्त्री प्रचण्डलाई काँध थापिरहन सकिँदैन’, उनले भने ।
महामन्त्री थापाले हरेक क्षेत्रमा भ्रष्टाचार बढेकाले सुशासन कायम गर्न २०४६ देखिका सार्वजनिक पदधारण गरेका सबैको सम्पत्ति छानबिन गर्ने प्रस्ताव संसद्मा लैजाने सुनाए ।