एमाले महासचिव पोखरेल नेतृत्वको टोली चीनमा भ्रमणमा
काठमाडौं– नेकपा एमाले महासचिव शंकर पोखरेल नेतृत्वको जम्बो टोली उत्तरी छिमेकी मुलुक चीन भ्रमणमा निस्किएको छ।नेकपा माओवादी केन्द्रका अध्यक्ष पुष्पकमल दाहाल प्रचण्डको चीन भ्रमण हुनु केही साताअघि चिनियाँ कम्युनिस्ट पार्टी (सीसीपी) को निमन्त्रणामा नेकपा एमाले महासचिव पोखरेल नेतृत्वको २२ सदस्यीय टोली बेइजिङ उडेको हो।
महासचिव पोखरेल नेतृत्वको उच्चस्तरीय प्रतिनिधिमण्डल शनिबार बेलुकी चीन गएको एमाले प्रचार विभागका सचिव गगन विष्टले जानकारी दिए।भ्रमण टोलीमा एमाले स्थायी समिति सदस्य तथा परराष्ट्र मामिला विभाग प्रमुख डा राजन भट्टराई, स्थायी समिति सदस्य तथा प्रचार विभाग प्रमुख राजेन्द्र गौतम, अखिल नेपाल महिला संघ अध्यक्ष दुकाभद्र हमाललगायत केन्द्रीय तहका नेता सहभागी रहेका छन्।
भ्रमण टोलीले चीनका तीन मुख्य सहर छोङछिङ, बेइजिङ र छिङहाइको १३ दिनसम्म भ्रमण गर्नेछ। भ्रमणका बेला नेपाल र चीनको द्विपक्षीय सम्बन्धका विविध पक्ष र एमाले चिनियाँ कम्युनिस्ट पार्टी (सीपीसी) बीचको पार्टीगत सम्बन्धका विभिन्न आयामबारे छलफल हुने एमाले प्रचार विभागका सचिव विष्टले बताए।
उनका अनुसार भ्रमणका क्रममा चिनियाँ कम्युनिस्ट पार्टीका उच्चस्तरका नेतासँग भेटवार्ता हुनेछ।
