सप्तकोसी उर्लिएपछि ५६ वटै ढोका खोलियो
३४ वर्षपछि यस वर्ष कोसीमा पानीको बहाव उच्च देखिएको हो ।
काठमाडौं– सुनसरीस्थित सप्तकोसी नदीमा पानीको बहाव यस वर्षकै उच्च मापन गरिएको छ । जिल्ला प्रहरी कार्यालय सप्तरीका प्रहरी नायब उपरीक्षक नरेशकुमार सिंहका अनुसार पहाडी क्षेत्रमा लगातार भइरहेको वर्षाका कारण बाढी आएपछि कोशी ब्यारेजमा पानीको बहाव उच्च भएको हो ।
पानीको बहाव उच्च भएपछि अहिले कोशी ब्यारेजका ५६ वटै ढोका खोलिएको जनाइएको छ ।प्रहरी नायब उपरीक्षक सिंहले ब्यारेजमा खतराको संकेतस्वरुप रातो बत्ती बालिएको जानकारी दिँदै आज बिहान ४ बजे पानीको बहाव चार लाख ६२ हजार क्युसेक मापन भएको बताए। यद्यपि पानीको वहाव केही घट्दो क्रममा रहेको छ ।
सप्तकोशीमा सन् १९८९ मा चार लाख ७२ हजार क्युसेक मापन भएको थियो । आज बिहान पनि ४ बजे चार लाख ६२ हजार क्युसेक मापन गरिएको कोसी ब्यारेज कल्ट्रोल रुमले जनाएको छ। ३४ वर्षपछि यस वर्ष कोसीमा पानीको बहाव उच्च देखिएको हो ।
पानीको बहाव उच्च भएपछि तल्लो तटीय क्षेत्रका बासिन्दालाई सतर्क रहन स्थानीय प्रशासनले आग्रह गरेको छ ।







