एमाले अवरोधपछि संसद् बैठक स्थगित
काठमाडौं– प्रमुख प्रतिपक्षी एमालेले आजको प्रतिनिधिसभा बैठक पनि अवरुद्ध गरेको छ।सुन तस्करी प्रकरणबारे छानबिन गर्न उच्चस्तरीय समिति बनाउन माग गर्दै एमालेले संसद्मा आज पनि अवरोध कायम राखेको हो।
एमाले सांसदहरुले बेल घेरेर नाराबाजी गरेपछि सभामुख देवराज घिमिरेले नियमित कार्यसूची हटाएर बैठक स्थगित गरे। प्रतिनिधिसभाको बैठक २९ साउन सोमबार दिउँसो १ बजे बस्ने गरी स्थगित भएको छ।आजको बैठकको सुरुमै एमाले सांसदहरूले उठेर विरोध जनाएपछि सभामुख घिमिरेले सांसद ज्वालाकुमारी साहलाई बोल्न समय दिएका थिए। सांसद साहले सुन तस्करी प्रकरणको छानबिन गर्न उच्चस्तरीय समिति बनाउन माग गरिन्। उनले उच्चस्तरीय समिति नबनेसम्म एमालेको अवरोध कायमै रहने बताइन्।
उनी बोलिरहँदा अन्य सांसदले होहल्ला गरिरहेका थिए। एमाले सांसद साहले कांग्रेस सांसद सुनील शर्मा पक्राउ परेकामा आपत्ति जनाइन्। उनले भनिन्, ‘सुन प्रकरणमा उच्चस्तरीय छानबिन समिति गठनको आवाज उठाइरहेको व्यक्तिलाई कुन हिसाबले पक्राउ गरियो? कानुनले पनि मिल्दैन। उहिले नै म्याद सकिएको प्रमाणपत्रलाई अहिले बखेडा झिकेर समातिएको छ। यसमा आपत्ति जनाउँछु।’
ज्वालाकुमारीले बोलेको केही नसुनिएको, नबुझिएको भन्दै सभामुखले बस्न आग्रह गरे। उनी बसिसकेपछि एमाले सांसदले नाराबाजी सुरु गरे। नाराबाजी नरोकिएपछि सभामुखले बैठक स्थगित गरे।







