सदन खुलाउन सभामुखसहित शीर्ष नेताको छलफल

काठमाडौं– लगातार अवरुद्ध हुँदै आएको संसद् बैठक खुलाउन सभामुख देवराज घिमिरेसहित प्रधानमन्त्री पुष्पकमल दाहाल प्रचण्ड, कांग्रेस सभापति शेरबहादुर देउवा, एमाले अध्यक्ष केपी ओलीबीच प्रधानमन्त्रीको सरकारी निवास बालुवाटारमा बैठक बसिरहेको छ ।

सुन प्रकरण छानबिनका लागि प्रमुख प्रतिपक्षी एमालेले उच्चस्तरीय छानबिन समितिको माग गर्दै सदन अवरुद्ध गर्दै आएको छ ।१० साउनदेखि संघीय संसद्का दुवै सदन निरन्तर अवरुद्ध छन् । प्रतिनिधिसभाका तीन वटा बैठक सूचना टाँस गरेर स्थगित हुँदै आएका छन् ।

अवरुद्ध सदन खुलाउने विषयमा सोमबार पनि सभामुख घिमिरेको पहलमा दुई पटक बैठक बसे पनि निष्कर्ष निस्कन सकेन ।

‘संसद् अवरोध हुँदा जनताका आवाज रोकिएका छन् । सांसदहरूले प्राकृतिक विपद्लगायतका धेरै जनसरोकारका विषय सदनलाई जानकारी दिन सक्नुभएको छैन । मैले अधिकतम रूपमा लचिलो भएर दलहरूलाई सहमतिका लागि सकारात्मक दबाब दिइरहेको छु । म दलहरुबीच आपसी विश्वास, एकता र सहकार्यको पक्षमा उभिँदै आएको छु,’ सोमबार सभामुख देवराज घिमिरेले भनेका थिए ।

दलहरूको एकता र सहकार्यकै निम्ति आफूले सूचना टाँसेर पटक–पटक बैठक स्थगित गरेको उनले बताएका थिए।सोमबारको बैठकमा सरकार पक्षले केही समय मागेको एमाले सचेतक महेश बर्तौलाले जानकारी दिएका थिए ।