काठमाडौं उपत्यकामा ठूलो वर्षा, सर्वसाधारणलाई नदी क्षेत्रमा नजान आग्रह
काठमाडौं–काठमाडौं उपत्यकाको बूढानीलकण्ठ, सुन्दरीजल, नगरकोट र वरपरका क्षेत्रमा ठूलो वर्षा भएको जल तथा मौसम विज्ञान विभाग, बाढी पूर्वानुमान महाशाखाले बताएको छ ।
अविरल वर्षाका कारण विष्णुमती, धोबीखोला, मनोहरालगायतमा जल सतह बढेको र सतर्कता नजिक पुगेकाले तटीय क्षेत्रमा नजान महाशाखाले आग्रह गरेको छ ।पधेरा दोभान (कर्मैया) जलमापन केन्द्रमा जल सतह खतरा तह पार गरेको पनि महाशाखाले ट्वीटमार्फत बताएको छ । जल सतह बढ्दो क्रममा रहेकाले रौतहट र सर्लाहीका बागमती नदी तटीय क्षेत्रमा बस्नेहरु मंगलबार बेलुकासम्मै सतर्क हुनुपर्ने भनिएको छ ।
पछिल्लो ३ देखि ६ घन्टाभित्र बागमती जलाधारको हरिहरपुगढी सिन्धुली, मरिन कुसुनटार र आसपास भारी वर्षा भएको महाशाखाले बताएको छ । थप वर्षा हुने देखिएकाले कोखाजोर खोला, मरिन खोला र आसपासका स–साना खोलामा आकस्मिक बाढी आउन सक्ने बताइएको छ ।उक्त ठाउँ वरपर कमजोर भिरालो जमिनमा पहिरोको जोखिम रहेकाले आज दिउँसो १ बजेसम्म उच्च सतर्कता अपनाउन सचेत गराइएको छ ।
