प्रतिनिधिसभा र प्रदेशसभा बन्दसूचीका २८ समानुपातिक उम्मेदवारविरुद्ध उजुरी
प्रतिनिधिसभातर्फ १३ र प्रदेशसभातर्फ १५ उम्मेदवार गरी २८ उम्मेदवारविरुद्ध आयोगमा उजुरी परेको हो।
काठमाडौं– निर्वाचन आयोगमा आगामी ४ मंसिरमा हुने प्रतिनिधिसभा र प्रदेशसभा निर्वाचनका लागि समानुपातिकतर्फको बन्दसूचीमा नाम भएका २८ उम्मेदवारविरुद्ध उजुरी परेको छ । प्रतिनिधि सभातर्फ १३ उम्मेदवार र प्रदेशसभातर्फ १५ उम्मेदवार गरी २८ उम्मेदवारविरुद्ध उजुरी परेको हो ।
समानुपातिक उम्मेदवारमा प्रधानमन्त्रीका प्रेस सल्लाहकार गोविन्द परियारदेखि कांग्रेसका दिवंगत नेता नवीन्द्रराज जोशीकी श्रीमतीसम्मका उम्मेदवारविरुद्ध उजुरी परेको छ ।
त्यस्तै, सरकारी लाभको पदमा बसेर बन्दसूचीमा नाम राखिएकाहरूको उम्मेदवारी खारेज गर्न माग गरिएको छ । केही उजुरीमा क्लस्टरमा नपर्ने व्यक्तिलाई राखिएकाले उनीहरूको नाम खारेज हुनुपर्ने माग गरिएको छ । उजुरीमा आदिवासी जनजाति, मधेसीलगायतका सूचीमा राखिएका व्यक्ति उक्त समूहको नभएको दाबी गरिएको छ ।
प्रतिनिधिसभा समानुपातिकतर्फका उम्मेदवार राष्ट्रिय स्वतन्त्र पार्टी, नेपाली कांग्रेस, जनता समाजवादी दल, नागरिक उत्मुक्ति पार्टी, लोकतान्त्रिक समाजवादी दल, नेपाली जनता दल, नेसनलिस्ट पिपुल्स पार्टी, बहुजन पार्टी, जनमत पार्टीलगायतका दलबाट सिफारिस भएका उम्मेदवारविरुद्ध उजुरी परेको आयोगले जनाएको छ ।
प्रतिनिधिसभामा सबैभन्दा बढी कांग्रेसले सिफरिस गरेका उम्मेदवारका विरुद्धमा उजुरी परेका छन् । प्रतिनिधिसभातर्फ १३ जनाविरुद्धमा परेका उजुरीमध्ये ६ जना कांग्रेसका छन् ।







