४ कात्तिकमा जनतासँग सुनिँदै एमाले अध्यक्ष ओली
ओलीसँग कुराकानी गर्न चाहनेले उनको फेसबुकको म्यासेज बक्समा आफ्नो नम्बर दिनुपर्नेछ
काठमाडौं–नेकपा एमाले अध्यक्ष केपी ओलीले ४ कात्तिकमा जनतासँग टेलिफोनमा कुरा गर्ने भएका छन् ।‘कल केपी बा’ नाम दिइएको आफ्नो फोटोसहितको पोस्टर सेयर गर्दै ओलीले फेसबुकमा लेखेका छन्, ‘४ कात्तिकमा म तपाईंको सम्पर्कमा हुनेछु, आउनुस् कुरा गरौं ।’
ओलीसँग कुराकानी गर्न चाहनेले उनको फेसबुकको म्यासेज बक्समा आफ्नो नम्बर दिनु पर्ने छ ।

स्वास्थ्यमा सुधार, कार्यकर्ता भेलालाई सम्बोधन गर्दै
एमाले अध्यक्ष ओलीको स्वास्थ्यमा सुधार आएको छ । स्वास्थ्यमा सुधार आएसँगै ओलीले बुधबार गृहजिल्ला झापामा आयोजना हुने दुई कार्यक्रमलाई सम्बोधन गर्ने भएका छन् ।
कार्यकर्ता भेटघाट तथा निर्वाचन प्रचारका क्रममा मंगलबार झापा पुगेका अध्यक्ष ओलीलाई ज्वरो आएको थियो । ज्वरो आएसँगै उनले घरमै आराम गरेका थिए ।
ओलीले बुधबार क्षेत्र–१ र ५ मा आयोजना हुने दुई वटा कार्यक्रमलाई सम्बोधन गर्न थालेको एमालेले बताएको हो । बिहान ११ बजे क्षेत्र–१ स्थित धुलाबारीमा हुने कार्यक्रममा राप्रपाका अध्यक्ष राजेन्द्र लिङदेन पनि सहभागी भएका छन्।बुधबारै दिउँसो २ बजे दमकको रोयल पार्टी प्यालेसमा आयोजना हुने क्षेत्र–५ स्तरीय नेता तथा कार्यकर्ता भेलालाई पनि ओलीले सम्बोधन गर्नेछन् ।







