उम्मेदवारी फिर्ता लिने आज अन्तिम दिन
निर्वाचन आयोगले आज बिहान १० बजेदेखि दिउँसो १ बजेसम्म उम्मेदवारी फिर्ता लिन सकिने बताएको हो
काठमाडौं– निर्वाचन आयोगले आगामी ४ मंसिरमा हुने प्रतिनिधिसभा र प्रदेश सभा चुनावका लागि २३ असोजमा उम्मेदवारी दिएका उम्मेदवारले बुधबार उम्मेदवारी फिर्ता लिन सकिने बताएको छ ।
निर्वाचन आयोगले आज बिहान १० बजेदेखि दिउँसो १ बजेसम्म उम्मेदवारी फिर्ता लिन सकिने बताएको हो । उम्मेदवारी फिर्ता लिन निर्वाचन अधिकृत कार्यालयमा गएर निवेदन दिनुपर्नेछ ।उम्मेदवार आफैं वा प्रतिनिधिमार्फत उम्मेदवारी फिर्ता लिन पाउेनछन् ।
सत्ता गठबन्धनले आज दिउँसो १ बजेभित्र बागी उम्मेदवारी फिर्ता लिइसक्न निर्देशन दिएको छ । नेपाली कांग्रेसले तोकिएको समयभित्र बागी उम्मेदवारले उम्मेदवारी फिर्ता नलिए स्वतः कारबाहीमा परेको मानिने बताएको छ ।आयोगले आजै अपरान्ह उम्मेदवारको अन्तिम नामावली प्रकाशन गर्ने तयारी गरेको छ । आयोगले बिहीबार साँझ उम्मेदवारलाई निर्वाचन चिन्ह दिने तयारी गरेको छ ।
प्रतिनिधिसभातर्फ २ हजार २ सय ९१ पुरुष र २ सय ३५ महिलासहित २ हजार ५ सय २६ जनाको उम्मेदवारी परेको छ । प्रदेशसभातर्फ ३ हजार १ सय ७८ पुरुष, २ सय ९७ महिला र एक अन्य गरी ३ हजार ४ सय ७६ जनाको उम्मेवारी परेको छ ।







