कामु प्रधानन्यायाधीश बने हरिकृष्ण कार्की
कामु प्रधानन्यायाधीश दीपककुमार कार्की पदावधि सकिएर बिदा भएपछि कार्कीले यो जिम्मेवारी सम्हालेका हुन्
काठमाडौं– सर्वोच्च अदालतका वरिष्ठतम न्यायाधीश हरिकृष्ण कार्की कायममुकायम (कामु) प्रधानन्यायाधीश बनेका छन् । कामु प्रधानन्यायाधीश दीपककुमार कार्की आफ्नो पदावधि सकिएर बिदा भएपछि कार्कीले यो जिम्मेवारी सम्हालेका हुन् ।प्रधानन्यायाधीशको अनुपस्थितिमा सबैभन्दा वरिष्ठ न्यायाधीशले स्वतः कामु प्रधानन्यायाधीशका रूपमा काम गर्ने प्रावधान छ ।
संविधानको धारा १२९ मा प्रधानन्यायाधीशको पद रिक्त भए वा प्रधानन्यायाधीश कुनै कारणले आफ्नो काम गर्न असमर्थ भए वा बिदा बसे वा देश बाहिर गएको कारणले सर्वोच्च अदालतमा उपस्थित हुने अवस्था नभए सर्वोच्चका वरिष्ठतम न्यायाधीशले कामु प्रधानन्यायाधीश भएर काम गर्ने व्यवस्था छ ।
सर्वोच्चका प्रधानन्यायाधीश चोलेन्द्रशमशेर जबराविरुद्ध १ फागुन २०७८ मा संसद्मा महाभियोग प्रस्ताव दर्ता भएपछि दीपककुमार कार्की कामु प्रधानन्यायाधीश बनेका थिए । कार्कीले उमेर हदका कारण १५ असोजमा अवकाश पाउँदै छन् । अवकाश पाउनुअघि नै उनी बिदा बसिसकेका छन् भने सर्वोच्चले उनको बिदाइ गरिसकेको छ ।a







