निलम्बित प्रधानन्यायाधीशमाथि राज्य संयन्त्रको दुरुपयोग :नेता ज्ञवाली
वरीयता प्रोटोकलमा चौथो नम्बरमा रहेका प्रधानन्यायाधीशलाई नजरबन्दमा राखिनु प्रजातन्त्रका लागि खतरा रहेको नेता ज्ञवालीको दाबी
काठमाडौं– एमाले नेता प्रदीप ज्ञवालीले प्रधानन्यायाधीश चोलेन्द्रशमशेर जबराविरुद्ध राज्य संयन्त्र दुरुपयोग गरिएको बताएका छन् ।एमाले निकट लोकतान्त्रिक आदिवासी जनजाति महासंघ नेपालको बैठकलाई सम्बोधन गर्दै नेता ज्ञवालीले प्रधानन्यायाधीश जबरालाई महाभियोग लगाएर कामकाजमा रोक लगाउनुका साथै महाभियोगमाथि ६ महिनासम्म छलफल नगरिनु अचम्म भएको दाबी गरे ।
‘६ महिनासम्म महाभियोगबारे छलफल नगर्ने अनि अब संसद्को आयु सकिन लाग्यो भनेपछि नाटक गर्ने र ६ जनाको जबरजस्त बहुमत बनाएर काइते प्रतिवेदनका आधारमा एक जना व्यक्तिविरुद्ध राज्य संयन्त्रको चरम दुरुपयोग गरियो’, ज्ञवालीले भने ।
उनले वरीयता प्रोटोकलमा चौथो नम्बरमा रहेका प्रधानन्यायाधीशको त अवस्था यस्तो छ भने नेपाली जनताको हालत के होला भन्दै प्रश्न गरे ।
ज्ञवालीले गठबन्धनसँग सत्ताको भागबण्डा र मिलीजुली खाने बाहेक अरु कुनै एजेन्डा नभएको दाबी गरे । ४ मंसिरमा हुने निर्वाचनले राजनीतिक स्थिरता चाहने र अस्थिरता चाहनेबीचको फैसला गर्ने दिन भएको भन्दै एमाले विजयी भए मात्रै मुलुकलाई स्थिरता दिने नेता ज्ञवालीको भनाइ छ ।







