महानगरले हटाउन थाल्यो असन, इन्द्रचोकका फुटपाथ पसल
इन्द्रचोकदेखि असन क्षेत्रको फुटपाथ खाली गराउन थालिएको हो।
काठमाडौं–काठमाडौं महानगरले असन क्षेत्रका फुटपाथको व्यापार हटाउन थालेको छ। इन्द्रचोक क्षेत्रमा पछिल्लो समय अव्यवस्थित रूपमा सञ्चालनमा भइरहेको पार्किङ, मन्दिर वरपरको व्यवसाय हटाइरहेको महानगरले बुधबारदेखि फुटपाथमा राखिका पसल हटाउन थालेको हो।
महानगरका नगर प्रहरी प्रमुख राजु पाण्डेका अनुसार इन्द्रचोकदेखि असन क्षेत्रको फुटपाथ खाली गराउन थालिएको छ । असन क्षेत्रमा हिँड्ने मान्छेका लागि फुटपाथमा राखेका भाँडाकुँडा, क्रिस्टलका सामग्री, खेलौना पसल, फेन्सीका सामान, माटाका सामग्री बुधबार बिहानसम्म हटाउन निर्देशन दिइएको छ ।

‘सडकपेटीसम्म राखेका केही सामग्री अहिले नै हटाएका छौं। बुधबारसम्म नहटाए महानगरका गाडीले उठाउँछन् । अहिले असनका व्यापारीलाई माइकिङ गरेर हटाउन आग्रह गरेका छौं,’ उनले भने ।
असनका साँघुरा गल्लीका दुवैतिरको फुटपाथमै पसल थापेपछि यात्रुलाई आउजाउमा समस्या हुने गरेको छ ।







