मन्त्रीलाई श्रेष्ठलाई लाइन बस्न भनेपछि पक्राउमा परे सुरक्षागार्ड !
जनता र मन्त्री सबै एउटै भएकाले लाइनअनुसार पालो कुर्न भनेकै भरमा प्रहरीले पक्रियो छाया सेन्टरका सुरक्षागार्ड
काठमाडौं– संस्कृति, पर्यटन तथा नागरिक उड्डयनमन्त्री जीवनराम श्रेष्ठलाई लाइनमा बसेर सर्वसाधारणले झैं कुर्न भनेकै आरोपमा एक जना सुरक्षागार्ड पक्राउ परेका छन् ।
मन्त्री श्रेष्ठमाथि दुव्र्यवहार गरेको भन्दै ठमेलस्थित छाया सेन्टरका सुरक्षागार्डलाई पक्राउ गरिएको जिल्ला प्रहरी परिसर काठमाडौंका प्रहरी वरिष्ठ उपरीक्षक (एसएसपी) भरत बोहराले बताए ।
पक्राउ पर्नेमा ग्रुप फोर सेक्युरिटीका सुरक्षागार्ड शेरजंग कुँवर छन्। उनीमाथि प्रहरीले अभद्र व्यवहारको मुद्दा चलाइने बताएको छ ।
प्रहरीका अनुसार मन्त्री श्रेष्ठ गत शुक्रबार छाया सेन्टरमा बायोमेट्रिक्सको कामका लागि पुगेका थिए। तर मन्त्री श्रेष्ठलाई पनि सुरक्षागार्डले लाइन बस्न भनेका थिए।
गार्डले जो मानिस भए पनि लाइनमा बस्नुपर्ने बताएपछि सत्ताको दुरुपयोग गरी मन्त्रीले प्रहरीलाई पक्राउ लगाएका हुन् ।







